“ஹார்முஸ் நீரிணையில கூட போயிடலாம் போல… டெல்லி காளிந்தி குஞ்ச் போக்குவரத்து நெரிசலைக் கிண்டல் செய்யும் நெட்டிசன்கள்..!!”

டெல்லியின் காளிந்தி குஞ்ச் பகுதியில் சமீபநாட்களாக நிலவி வரும் கடுமையான போக்குவரத்து நெரிசல் இணையதளங்களில் விவாதப் பொருளாக மாறியுள்ளது. மும்பை, டெல்லி போன்ற பெருநகரங்களில் மழைக்காலம் வந்தாலே போக்குவரத்து நெரிசல் என்பது தவிர்க்க முடியாத ஒன்றாக மாறுகிறது. அதிலும் காளிந்தி குஞ்ச் பகுதி ஏற்கனவே நெரிசலுக்குப் பெயர் பெற்றது என்றாலும், தற்போதைய மழைக்காலம் மற்றும் கான்வர் யாத்திரையை முன்னிட்டு செய்யப்பட்டுள்ள போக்குவரத்து வழிமாற்றங்களால் வாகன ஓட்டிகள் பல மணி நேரம் இங்கேயே சிக்கித் தவிக்கும் சூழல் ஏற்பட்டுள்ளது.

நோய்டாவிலிருந்து காளிந்தி குஞ்ச் நோக்கி வரும் மேம்பாலத்தில் இருந்து பாலம் வரை நீளும் மிகக் கடுமையான இந்த நெரிசலை, அங்குள்ள புகழ்பெற்ற ‘சூப்பர்நோவா’ கட்டிடத்தின் உயரமான பகுதியிலிருந்து ஒருவர் வீடியோவாகப் படம்பிடித்துள்ளார். இதில் வாகனங்கள் நகராமல் ஒரே இடத்தில் அணிவகுத்து நிற்கும் காட்சிகள் தெளிவாகத் தெரிகின்றன. டெல்லி மக்களின் அன்றாட அவதியை வெளிப்படுத்தும் இந்த வீடியோ சமூக வலைதளங்களில் மிக வேகமாகப் பரவி, இதுவரை 30 லட்சத்திற்கும் அதிகமான பார்வைகளைப் பெற்றுள்ளது.

https://www.instagram.com/reel/Dbm54oiq1rZ/?utm_source=ig_web_button_share_sheet

இந்த வீடியோவைப் பார்த்த இணையதளப் பயனர்கள் தங்களின் கோபத்தையும் கருத்துகளையும் சமூக வலைதளங்களில் பதிவிட்டு வருகின்றனர். சிலர் உலகின் மிக நெரிசலான ‘ஹார்முஸ் நீரிணை’ வழியாகச் செல்வது கூட இதைவிட எளிதானது என்று கிண்டல் செய்துள்ளனர். மேலும் சிலர், “சாலையின் மோசமான பொறியியல் வடிவமைப்பு, வணிக ரீதியிலான வாகனங்களின் சுங்கக்கட்டணம் செலுத்தும் முறை மற்றும் அதிகாரிகளின் அலட்சியப் போக்குமே தினசரி ஏற்படும் இந்த அவதிக்கு முக்கியக் காரணம்” எனக் குற்றம்சாட்டியுள்ளனர்.