நான் விழுந்த போது தூக்கிவிட்டது அவர்தான்…பார்த்திபன் – சீதா திருமணப் பதற்றம்…’மருதுபாண்டி’ கிளைமாக்ஸ் காட்சியில் இளையராஜா செய்த உலகத்தரம் வாய்ந்த மேஜிக்! வெளிவந்த உண்மை…!

இசைஞானி இளையராஜாவின் பிறந்தநாளை முன்னிட்டு, அவருடனான தனது திரைப்பயண நினைவுகளையும், “மருதுபாண்டி” படம் உருவானபோது நடந்த சுவாரசியமான தகவல்களையும் இயக்குனர் மனோஜ் குமார் நேர்காணல் ஒன்றில் நெகிழ்ச்சியுடன் பகிர்ந்துள்ளார். ராம்கி மற்றும் சீதா நடிப்பில் உருவான ‘மருதுபாண்டி’ திரைப்படத்தின் இறுதிக்கட்டப் படப்பிடிப்பு, சினிமாவில் ஏற்பட்ட திடீர் வேலைநிறுத்தம் காரணமாகத் தற்காலிகமாக நிறுத்தப்பட்டது. ஸ்டிரைக் முடிந்ததும், மீதமிருந்த பாடல்களை மிக அவசரமாகப் பதிவு செய்ய வேண்டிய கட்டாயம் இயக்குனருக்கு ஏற்பட்டது. அதற்குப் பின்னணியில், படத்தில் நடித்துக் கொண்டிருந்த நடிகை சீதாவை இயக்குனர் பார்த்திபன் காதலித்து வந்ததும், அவர்கள் இருவரும் விரைவில் திருமணம் செய்துகொள்ளப் போகிறார்கள் என்ற தகவலும் தான் காரணமாக இருந்தது. ஒருவேளை அவர்கள் திருமணம் செய்துகொண்டு சென்றுவிட்டால் படத்தை முடிக்க முடியாது என்ற இக்கட்டான சூழல் நிலவியதால், எப்படியாவது பாடல்களை விரைவாக முடித்துத் தருமாறு இளையராஜாவிடம் இயக்குனர் கோரிக்கை வைத்தார்.

அந்தக் காலகட்டத்தில் தெலுங்கு சூப்பர் ஸ்டார்களான சிரஞ்சீவி, நாகர்ஜுனா போன்றோரே இளையராஜாவின் கால்ஷீட்டைப் பொறுத்துத்தான் படங்களின் தேதிகளை ஒதுக்கும் அளவிற்கு இசைஞானி உச்சகட்ட பிஸியாக இருந்தார். பிரசாத் ஸ்டுடியோவில் பல முன்னணி இயக்குனர்களும் தயாரிப்பாளர்களும் இளையராஜாவின் வருகைக்காகக் காத்திருந்த சூழலில், இயக்குனர் மனோஜ் குமார் அதிகாலையிலேயே சென்று அவரைச் சந்தித்து நிலைமையை விளக்கினார். சீதாவின் திருமணப் பதற்றத்தைப் புரிந்துகொண்ட இசைஞானி, மற்ற அனைவரையும் விட இவருக்கு முன்னுரிமை அளித்து உடனே பாடல்களைக் கம்போஸ் செய்யத் தொடங்கினார். அன்று அவர் காட்டிய வேகம் யாராலும் கற்பனை செய்ய முடியாதது; காலை 7 மணி முதல் மதியம் 1 மணி வரை ஒரு பாடல், மதியம் 2 மணி முதல் மாலை 6 மணி வரை ஒரு பாடல், மீண்டும் இரவு 6 மணி முதல் 9 மணி வரை மற்றொரு பாடல் என ஒரே நாளில் மூன்று பாடல்களைக் கம்போஸ் செய்து, முழுமையாகப் பதிவு செய்தும் கொடுத்து அங்கிருந்தவர்களை ஆச்சரியத்தில் ஆழ்த்தினார்.

கதை எழுதவும் இயக்கவும் தெரிந்த தனக்கு இசையைப் பற்றி பூஜ்ஜிய அறிவுதான் இருந்தது என்று குறிப்பிட்டுள்ள இயக்குனர் மனோஜ் குமார், மருதுபாண்டி கிளைமாக்ஸ் காட்சிக்கான ரீ-ரிக்கார்ட்டிங்கின் போது இசைஞானி அமைத்த பின்னணி இசையைக் கேட்டு தியேட்டரிலேயே அழுதுவிட்டதாகக் கூறியுள்ளார். குழந்தைகளைப் பாதுகாத்த ஒருவன், அவரே ஒரு குழந்தை போலக் கைதாகிச் செல்லும் அந்தப் பாத்திரப் படைப்பைத் தனது இசையால் உலகத் தரத்திற்கு உயர்த்தியிருந்தார் இளையராஜா. அப்போது ராம்கி, சீதா இருவருமே பெரிய மார்க்கெட் இல்லாத சாதாரண நடிகர்களாக இருந்தபோதிலும், தியேட்டரில் ‘இளையராஜா’ என்று டைட்டில் கார்டு போட்டதற்கே ரசிகர்கள் தியேட்டரே அதிரும் வகையில் கைதட்டினார்கள். “நான் விழுந்த நேரத்தில் என்னை மீண்டும் எழுந்து நிற்க வைத்தது மருதுபாண்டி படமும், பண்ணைப்புரத்து சித்தரின் ஆசிர்வாதமும்தான்; அந்தப் படத்தின் முழு வெற்றிக்கும் இசைஞானி மட்டும்தான் காரணம்” என்று இயக்குனர் மனோஜ் குமார் சிலிர்ப்போடு நன்றியறிதலைப் பகிர்ந்துள்ளார்.