CRIME
“ஒரே வழக்கில் 13 பேர் கைது..” காதலியைக் கற்பழித்த நண்பன்… உடந்தையாக இருந்த காதலன்.. பழிவாங்கத் தீட்டப்பட்ட பயங்கரக் கடத்தல் திட்டம்.. திடுக்கிடும் பின்னணி..!!
பெங்களூருவில் வசித்து வந்த ஆந்திராவைச் சேர்ந்த மென்பொருள் பொறியாளர்களான பி. மகேந்திரா மற்றும் தருண் ஆகியோர் கடத்தப்பட்டதாகப் பதிவான புகார், அடுத்த சில மணி நேரங்களிலேயே பாலியல் வன்கொடுமை மற்றும் பழிவாங்கல் என முற்றிலும் எதிர்பாராத இரட்டைத் திருப்பங்களைச் சந்தித்துள்ளது. கடந்த அக்டோபர் 28-ம் தேதி அதிகாலை இந்த இருவரும் தங்களது வீடுகளில் இருந்து கடத்தப்பட்டதாக மகேந்திராவின் தந்தை ரமணா காவல்துறையில் புகார் அளித்தார். புகாரைப் பெற்றுக்கொண்ட காவல்துறையினர், கண்காணிப்பு கேமரா பதிவுகள் மற்றும் தொழில்நுட்பத் தரவுகளின் அடிப்படையில் உடனடியாக விசாரணையை முடுக்கிவிட்டு, கடத்தப்பட்ட ஆறு மணி நேரத்திற்குள்ளாகவே இரு பொறியாளர்களையும் பத்திரமாக மீட்டனர்.
ஆனால், கடத்தப்பட்டவர்கள் மீட்கப்பட்ட பிறகு இந்த வழக்கில் ஒரு அதிரடித் திருப்புமுனையாக அவர்கள் இருவர் மீதும் பாலியல் வன்கொடுமை குற்றச்சாட்டு எழுந்தது. பொறியாளரான தருணின் 21 வயது காதலியை, கடந்த அக்டோபர் 24-ம் தேதி மகேந்திரா பாலியல் வன்கொடுமை செய்ததாகவும், அதற்குத் தருண் உடந்தையாக இருந்து அந்தப் பெண்ணை அறைக்குள் அடைத்து வைத்ததாகவும் காவல்துறை அதிகாரிகள் தெரிவித்தனர். பாதிக்கப்பட்ட அந்தப் பெண்ணின் வாக்குமூலத்தைப் பதிவு செய்துகொண்ட காவல்துறையினர், இந்த பாலியல் வன்கொடுமை புகாரின் அடிப்படையில் மீட்கப்பட்ட இரண்டு மென்பொருள் பொறியாளர்களையும் அதிரடியாகக் கைது செய்து சிறையிலடைத்தனர்.
மறுபுறம், இந்த பாலியல் வன்கொடுமைச் சம்பவத்திற்குப் பழிவாங்கும் நோக்கோடும், மகேந்திராவின் தந்தையிடம் இருந்து பெருந்தொகை பணம் பறிக்கும் திட்டத்தோடும் இந்தக் கடத்தல் நாடகம் அரங்கேற்றப்பட்டதாகக் காவல்துறையினர் சந்தேகிக்கின்றனர். சிசிடிவி மற்றும் தொழில்நுட்ப ஆதாரங்களின் அடிப்படையில், இந்த கடத்தல் திட்டத்தில் தொடர்புடையதாக 21 வயது இளம்பெண் உட்பட மொத்தம் 11 பேரை காவல்துறையினர் கைது செய்துள்ளனர். ஒரே சம்பவத்தில் கடத்தல் மற்றும் பாலியல் வன்கொடுமை என இரண்டு வெவ்வேறு குற்றச்சாட்டுகள் தொடர்பாகக் கைது செய்யப்பட்டுள்ள அனைவரிடமும் காவல்துறையினர் மற்றும் நீதிமன்ற நடவடிக்கைகள் மூலம் தீவிர விசாரணை தொடர்ந்து நடைபெற்று வருகிறது.
