“நகை வாங்க வந்த இடத்தில் ஆட்டைய போட்ட பெண்” உரிமையாளரின் கவனத்தைத் திசை திருப்பி 2 பவுன் தங்க நாணயத்தை திருடிய பெண்.. தருமபுரியில் அதிர்ச்சி..!!

தருமபுரி மாவட்டம் காரிமங்கலத்தில் உள்ள ஒரு நகைக்கடையில் வாடிக்கையாளர் போல நடித்து, 2 பவுன் தங்க நாணயத்தை ஒரு பெண் லாவகமாகத் திருடிச் சென்ற சம்பவம் அப்பகுதியில் பெரும் பரபரப்பை ஏற்படுத்தியுள்ளது. காரிமங்கலம் பகுதியைச் சேர்ந்த 46 வயதான ரஞ்சித் என்பவர் அப்பகுதியில் நகைக்கடை ஒன்றை நடத்தி வருகிறார். கடந்த செவ்வாய்க்கிழமை மாலை நேரத்தின்போது, இவரது கடைக்கு நகை வாங்குவதற்காக ஒரு பெண் வந்துள்ளார்.

அந்தப் பெண் நகைகளை வாங்குவது போல நடித்து, கடையின் உரிமையாளர் ரஞ்சித்தின் கவனத்தை மிகச் சாமர்த்தியமாகத் திசை திருப்பியுள்ளார். பின்னர் கடையின் உரிமையாளர் கவனிக்காத அந்த நொடிகளைப் பயன்படுத்திக் கொண்டு, அங்கிருந்த 2 பவுன் தங்க நாணயத்தைக் கையின் நகர்த்தி லாவகமாகத் திருடியுள்ளார். நாணயத்தைத் திருடிய அடுத்த சில நிமிடங்களிலேயே எதுவும் தெரியாதது போல அவர் கடையை விட்டும் வெளியேறியுள்ளார்.

இரவு நேரத்தில் கடையை அடைப்பதற்கு முன்பாக நகைகளைச் சரிபார்த்தபோதுதான், 2 பவுன் தங்க நாணயம் காணாமல் போயிருப்பது ரஞ்சித்திற்குத் தெரியவந்தது. இதனால் அதிர்ச்சியடைந்த அவர் கடையில் இருந்த சிசிடிவி (CCTV) கேமரா காட்சிகளை ஆய்வு செய்தபோது, நகை வாங்க வந்த பெண் நாணயத்தைத் திருடிச் சென்றது உறுதியானது. இதுகுறித்து ரஞ்சித் காரிமங்கலம் காவல் நிலையத்தில் புகார் அளித்ததை அடுத்து, போலீசார் சிசிடிவி காட்சிகளின் அடிப்படையில் அந்தப் பெண்ணைத் தீவிரமாகத் தேடி வருகின்றனர்.