டெல்லி ஏர் இந்தியா விமானத்தில் நடந்தது என்ன…? காயமடைந்த பயணிகளிடம் வீடியோவை மறைக்கச் சொன்ன ஊழியர்கள்..! பெண் பயணி பகிரங்கக் குற்றச்சாட்டு..!!

ஏர் இந்தியா விமானத்தில் ஏற்பட்ட கடுமையான காற்சுழற்சி மற்றும் அதைத் தொடர்ந்து விமான நிறுவனம் நடந்துகொண்ட விதம் குறித்து பயணி ஒருவர் குற்றச்சாட்டுகளை முன்வைத்துள்ளார். புூகெட்டில் இருந்து புதுடெல்லி நோக்கி வந்த AI2379 என்ற ஏர் இந்தியா விமானத்தில் பயணம் செய்த ஷில்பி ஜெயின் என்ற பயணி, சமூக வலைதளத்தில் வெளியிட்டுள்ள வீடியோவில் தனது அதிர்ச்சிகரமான அனுபவத்தைப் பகிர்ந்துள்ளார். விமானம் நடுவானில் பறந்துகொண்டிருந்தபோது திடீரென சுமார் 300 அடி கீழே இறங்கியதாகவும், இதனால் இருக்கை வார்ப் பட்டை அணியாத பயணிகள் மற்றும் ஊழியர்கள் மேலே தூக்கி வீசப்பட்டுப் பலத்த காயமடைந்ததாகவும் அவர் தெரிவித்துள்ளார்.

சம்பவத்தின் போது பணிப்பெண்கள் பயணிகளுக்கு உதவியதை பாராட்டிய அதே வேளையில், அவர்கள் மீது ஒரு முக்கிய குற்றச்சாட்டையும் ஷில்பி சுமத்தியுள்ளார். இச்சம்பவம் தொடர்பான வீடியோக்களை சமூக வலைதளங்களில் பதிவேற்ற வேண்டாம் என்றும், அது ஏர் இந்தியா நிறுவனத்தின் பெயருக்குக் களங்கம் விளைவிக்கும் என்றும் விமான ஊழியர்கள் பயணிகளிடம் கேட்டுக்கொண்டதாக அவர் கூறியுள்ளார். மேலும், பயணிகள் சிலர் காயமடைந்த நிலையிலும் லக்னோவில் அவசர தரையிறக்கம் செய்யாமல், டெல்லியில் சிறந்த மருத்துவ வசதிகள் இருப்பதாகக் கூறி விமானம் டெல்லி நோக்கியே தொடர்ந்து இயக்கப்பட்டது என்றும் அவர் விமர்சித்துள்ளார்.

https://www.instagram.com/reel/Dbnk0k-TLjb/?utm_source=ig_web_button_share_sheet

டெல்லி விமான நிலையத்தில் தரையிறங்கிய பின்னரும் கூட காயமடைந்த பயணிகளுக்கு உடனடியாக மருத்துவ உதவி கிடைக்கவில்லை என்று ஷில்பி குற்றஞ்சாட்டியுள்ளார். காயமடைந்தவர்கள் சிகிச்சைக்காகப் பல நிமிடங்கள் காத்திருக்க வேண்டியிருந்ததாகவும், ஸ்ட்ரெச்சர்கள் கிடைக்காததால் சிலர் சக்கர நாற்காலிகளிலேயே அழைத்துச் செல்லப்பட்டதாகவும் அவர் தெரிவித்துள்ளார். மேலும், டெல்லி வந்தடைந்த பிறகு பயணிகளுக்குக் குடிநீர் கூட உடனடியாக வழங்கப்படவில்லை என்றும் அவர் குற்றம் சாட்டியுள்ளார். இக்குற்றச்சாட்டுகள் குறித்து ஏர் இந்தியா நிறுவனம் இதுவரை எந்தவொரு அதிகாரப்பூர்வ விளக்கமும் அளிக்கவில்லை.