“1967-ல் அண்ணாவிடம் கேட்ட அதே கேள்விதான்” இன்று விஜயிடமும் கேட்கப்பட்டது.. கலைஞருக்கே அப்போ வெறும் வயசு 26 தான்…. பேரவையில் அமைச்சர் ஆதவ் அர்ஜுனா அதிரடி…!!

“கட்சி தொடங்கிய இரண்டு வருடங்களில் ஆட்சியைப் பிடிக்க முடியுமா என்று 1967-ல் பேரறிஞர் அண்ணாவிடம் கேட்கப்பட்ட அதே கேள்விகள் தான், தற்பொழுது தமிழக வெற்றிக் கழகத்தின் தலைவர் விஜயிடமும் கேட்கப்பட்டன” என்று அமைச்சர் ஆதவ் அர்ஜுனா சட்டப்பேரவையில் சுட்டிக்காட்டிப் பேசினார். அண்ணாவின் அரசியல் வரலாற்றுடன் தற்போதைய தவெக-வின் அரசியல் எழுச்சியை ஒப்பிட்டு அவர் ஆற்றிய இந்த உரை சட்டமன்றத்தில் அனைவரின் கவனத்தையும் ஈர்த்தது.

மேலும் பேசிய அவர், “பேரறிஞர் அண்ணா அவர்கள் தனியாகக் கட்சி ஆரம்பிக்கும் போது, அவருக்குப் பின்னால் இருந்தது ஒட்டுமொத்த இளைஞர்கள் கூட்டம் தான். ஏன், அன்று அண்ணாவின் பின்னால் நின்ற கலைஞருக்கே அப்போது வயது வெறும் 26 தான்” என்று வரலாற்றுச் சான்றுகளை நினைவு கூர்ந்தார். இதன் மூலம் அரசியலில் இளைஞர்களின் பங்களிப்பும், ஆரம்பகால அரசியல் சூழலும் எவ்வாறு தவெக-வின் தற்போதைய வளர்ச்சிக்கு இணையாக உள்ளது என்பதை அவர் விவரித்தார்.

இறுதியாக, தமிழக அரசியல் வரலாற்றில் ஏற்பட்ட மாபெரும் மாற்றங்களைக் குறிப்பிட்ட அமைச்சர் ஆதவ் அர்ஜுனா, “கடந்த 1967 மற்றும் 1977 ஆகிய ஆண்டுகளில் தமிழகத்தில் எத்தகைய அரசியல் புரட்சிகள் நடந்தனவோ, அத்தகையதொரு பிரம்மாண்ட புரட்சி தான் தற்பொழுது 2026-ல் நடந்திருக்கிறது. இதுதான் பேரறிஞர் அண்ணா அன்று கண்ட உண்மையான புரட்சி” எனத் தவெக-வின் வெற்றியை அண்ணாவின் லட்சியப் புரட்சியோடு ஒப்பிட்டுப் பெருமிதத்துடன் பேசி முடித்தார்.