“கீர்த்தனா என்னுடைய தங்கை” சீண்டுபவர்கள் சீண்டட்டும்… மேடையிலேயே கையை பிடித்து.. அமைச்சர் ஜெகதீஸ்வரி செய்த காரியம்… வைரலாகும் நெகிழ்ச்சி வீடியோ..!!

தமிழக வெற்றிக் கழகத்தின் அமைச்சரவையில் இடம்பெற்றுள்ள பெண் அமைச்சர்களான ஜெகதீஸ்வரி மற்றும் கீர்த்தனா ஆகிய இருவருக்கும் இடையே மோதல் போக்கு நிலவுவதாக அண்மையில் சமூக வலைத்தளங்களில் வதந்திகள் பரவின. இந்தச் சூழலில், விருதுநகர் மாவட்டத்தில் நடைபெற்ற அரசு விழா ஒன்றில் கலந்துகொண்ட பால்வளத்துறை அமைச்சர் ஜெகதீஸ்வரி, தன் அருகில் நின்றுகொண்டிருந்த தொழில்துறை அமைச்சர் கீர்த்தனாவின் கைகளை மேடையில் உயர்த்திப் பிடித்து, தங்களுக்குள் எந்தவித கருத்து வேறுபாடும் இல்லை என்பதைப் பொதுவெளியில் நிரூபித்து வதந்திகளுக்கு முற்றுப்புள்ளி வைத்துள்ளார்.

விழா மேடையில் நெகிழ்ச்சியுடன் பேசிய அமைச்சர் ஜெகதீஸ்வரி, “கீர்த்தனா என்னுடைய தங்கை போன்றவர்; நாங்கள் எப்போதும் மிகவும் ஒற்றுமையாகத் தான் செயல்படுவோம்” என்று மிக உறுதியாகக் குறிப்பிட்டார். மேலும், அரசியல் களத்தில் தங்களைப் பற்றி அவதூறு பரப்புபவர்களை நோக்கி, “நம்மைச் சீண்டுபவர்கள் சீண்டட்டும், போற்றுபவர்கள் போற்றட்டும்” என்று தத்துவார்த்தமாகப் பதிலளித்த அவர், தங்களின் சகோதரத்துவப் பிணைப்பை எவராலும் அசைக்க முடியாது என்பதைப் பறைசாற்றினார்.

https://twitter.com/polimernews/status/2082148944868757540/video/1

விருதுநகர் மாவட்டத்தின் அரசியல் செயல்பாடுகள் குறித்துப் பேசிய அவர், இந்த மாவட்டத்தில் தங்களை இரண்டு பெண் அமைச்சர்கள் என்று அழைப்பதை விட, “இரண்டு பெண் புலிகள்” என்று அழைப்பதே பொருத்தமாக இருக்கும் என மக்கள் கூறுவதாகக் குறிப்பிட்டார். எனினும், தங்களை யாரும் புலிகளுடன் ஒப்பிடத் தேவையில்லை என்று கூறிய ஜெகதீஸ்வரி, “நாங்கள் புலிகளும் இல்லை, முதலமைச்சர் விஜய்யின் வழியில் நடக்கும் சிங்கக் குட்டிகள்” என்று கம்பீரமாக முழங்கி மேடையை அதிரவைத்தார்