“வாவ்.. நேத்து நைட்டு நீங்களும் அதை பார்த்தீங்களா..?” சூரியன் மறைஞ்சதும் வானத்துல நடந்த அதிசயம்… நிலவும் வெள்ளி கிரகமும் இணைந்த அபூர்வ காட்சி..!!

உத்தரப்பிரதேசத்தில் உள்ள வானியல் ஆர்வலர்கள் மற்றும் பொதுமக்கள் செப்டம்பர் 14 மாலையில் ஒரு அரிதான மற்றும் பிரமிக்க வைக்கும் வானியல் நிகழ்வைக் கண்டு ரசித்தனர். மாலை நேர அந்திப் பொழுதில், மெல்லிய பிறை சந்திரனும், பிரகாசமான சுக்கிரன் கிரகமும் அருகருகே மிக நெருக்கமாக இணைந்து காட்சிளித்தன. இந்த அரிய விண்வெளி இணைப்பானது கான்பூர், லக்னோ, கோரக்பூர் உட்பட உத்தரப்பிரதேசத்தின் பல்வேறு பகுதிகளில் வசிக்கும் மக்களின் கவனத்தை ஈர்த்தது. மேலும், புவனேஸ்வர் உட்பட ஒடிசாவின் சில பகுதிகளிலும் இந்த அழகு மிளிரும் நிகழ்வைக் காண முடிந்தது.

சூரிய அஸ்தமனத்திற்குப் பிறகு மேற்குத் திசையில் தோன்றிய இந்த மெல்லிய பிறை நிலவும், சுக்கிர கிரகத்தின் பிரகாசமான ஒளிப்புள்ளியும் மாலையின் வான நிறமாற்றங்களுக்கு நடுவே ஒரு அழகிய இயற்கை ஓவியம் போலக் காட்சியளித்தன. இதைத் தொடர்ந்து, ஏராளமான பொதுமக்கள் மற்றும் விண்வெளி ஆர்வலர்கள் தங்கள் வீடுகளுக்கு வெளியே வந்து இந்த அதிசய நிகழ்வைப் பார்த்ததுடன், புகைப்படங்கள் மற்றும் வீடியோக்களையும் எடுத்துப் பகிர்ந்து கொண்டனர். அன்றைய தினத்தின் தொடக்கத்தில், சில பகுதிகளில் சுக்கிரன் கிரகமானது சந்திரனின் பின்புறமாகச் சென்று மறையும் “பகல்நேர கிரக மறைப்பு” நிகழ்ந்தது. அதன் பின்னர், மாலையில் இருவரும் மீண்டும் ஒன்றாக இணைந்து தோன்றினர்.

பூமியிலிருந்து பார்க்கும்போது சந்திரன் மற்றும் சுக்கிரன் ஆகிய இரண்டும் மிகவும் பிரகாசமாகத் தெரியும் விண்பொருட்களாகும். சந்திரன் சூரியனின் ஒளியைப் பிரதிபலிக்கும் வேளையில், சுக்கிரன் கிரகம் தன் அடர்ந்த வளிமண்டலத்தின் காரணமாகச் சூரிய ஒளியைப் பெருமளவில் விண்வெளிக்குத் திருப்பி அனுப்புவதால் மிகவும் பிரகாசமாக மிளிர்கிறது. தொலைநோக்கி எதுவுமின்றி வெறும் கண்களாலேயே இதைப் பார்க்க முடிந்தது. விண்வெளியில் இவை இரண்டும் வெகு தொலைவில் அமைந்திருந்தாலும், பூமியிலிருந்து பார்க்கும் கோணத்தின் காரணமாகவே இரண்டும் மிகவும் அருகில் இருப்பது போன்ற இந்த அரிய இணைப்பு நிகழ்வு நமக்குக் காட்சியளிக்கிறது.