சாலை தரம் கேட்டதற்கு இப்படியா? நடுரோட்டில் வாலிபரின் கன்னத்தில் பளார் விட்ட பாஜக அமைச்சர்.. பரபரப்பு சம்பவம்..!!

டெல்லியின் திலக் நகர் பகுதியில் சாலைத் தரம் குறித்து கேள்வி எழுப்பிய இளைஞர் ஒருவரை, அம்மாநில பொதுப்பணித்துறை அமைச்சர் பர்வேஷ் வர்மா கன்னத்தில் அறைந்த சம்பவம் பெரும் பரபரப்பை ஏற்படுத்தியுள்ளது. திலக் நகர் ஆம் ஆத்மி கட்சி எம்.எல்.ஏ.வான ஜர்னைல் சிங் முன்னிலையில் இந்த ஆய்வு நடந்தபோது, சாலை கட்டுமானப் பணிகள் மோசமாக இருப்பதைச் சுட்டிக்காட்டிய சாஹிப் என்ற இளைஞரை அமைச்சர் ஆத்திரத்தில் அறைந்ததாகக் கூறப்படுகிறது. இந்தத் தாக்குதல் தொடர்பான வீடியோ இணையத்தில் வைரலாகி வரும் நிலையில், தன்னை அமைச்சருடன் வந்தவர்கள் கொலை மிரட்டல் விடுத்ததாகவும், அமைச்சர் இதற்கு மன்னிப்புக் கேட்டு அவர் மீது இடைநீக்க நடவடிக்கை எடுக்க வேண்டும் என்றும் கூறி அந்த இளைஞர் காவல் நிலையத்தில் புகார் அளித்துள்ளார்.

மறுபுறம், இந்த விவகாரம் குறித்து விளக்கம் அளித்துள்ள அமைச்சர் பர்வேஷ் வர்மா, பாதிக்கப்பட்டதாகக் கூறப்படும் இளைஞர் ஆம் ஆத்மி கட்சியின் தொண்டர் என்றும், அவர் தனது குடும்பத்தினரை அவதூறாகப் பேசியதாலேயே இந்தத் தகராறு ஏற்பட்டது என்றும் தெரிவித்துள்ளார். ஆனால், தான் வெறும் குற்றச்சாட்டுகளை மட்டும் வைக்கவில்லை என்றும், தன்னிடம் இதற்கான முழு ஆதாரங்கள் இருப்பதாகவும் அந்த இளைஞர் கூறியுள்ளார். டெல்லி அரசியல் வட்டாரத்தில் பெரும் அனலைக் கிளப்பியுள்ள இச்சம்பவம் குறித்து போலீசார் தற்போது தீவிர விசாரணை மேற்கொண்டு வருகின்றனர்.