“ரூ.43,000 சாம்பலாகிடுச்சு.. நவம்பரில் வாங்கிய தங்கக் காப்பு…” நண்பர் சொன்ன 2 நிமிடக் கணக்கால் தலைகீழாக மாறிய கோடீஸ்வரக் கனவு.. இணையத்தில் வைரலாகும் கசப்பான உண்மை..!!

தங்க நகைகளை வாங்குவது சிறந்த முதலீடா அல்லது முதலீடு என்ற பெயரில் நாம் செய்யும் ஒரு விலையுயர்ந்த உணர்வுப்பூர்வமான ஏமாற்றமா என்ற விவாதம் தற்போது முதலீட்டாளர்களிடையே பெரும் விவாதப் பொருளாக மாறியுள்ளது. கடந்த ஆண்டு நவம்பர் மாதம் 17 கிராம் எடையுள்ள 22 கேரட் தங்கக் கைக்காப்பு ஒன்றை ஒரு நபர் மொத்த மதிப்பு தோராயமாக ரூ.2,32,000 வாங்கியுள்ளார். தற்போதைய சூழலில் தங்கத்தின் விலை தொடர்ந்து அதிகரித்து வருவதால், தான் ஒரு நல்ல லாபகரமான முதலீட்டைச் செய்திருப்பதாக அவர் மகிழ்ந்திருந்தார். ஆனால், அவரது நண்பர் ஒருவர் வெறும் 2 நிமிடங்களில் இந்த ஒட்டுமொத்தக் கணக்கீட்டையும் தலைகீழாக மாற்றி, நகையாகத் தங்கம் வாங்குவதில் ஒளிந்திருக்கும் கசப்பான உண்மைகளைப் புரிய வைத்துள்ளார்.

அந்தக் கைக்காப்பை வாங்குவதற்காகச் செய்கூலி மற்றும் சேதாரக் கட்டணமாக மட்டுமே சுமார் ரூ.42,000 முதல் ரூ.43,000 வரை அவர் கூடுதல் பணம் செலுத்தியுள்ளார். நாம் நகைகளை விற்கும்போது இந்தச் செய்கூலி, சேதாரப் பணம் நமக்குத் திரும்பக் கிடைக்காது என்பதும், நகையின் தூய்மை மற்றும் பிற காரணங்களுக்காக மேலும் சில தொகைகள் கழிக்கப்படும் என்பதும் குறிப்பிடத்தக்கது. தங்கத்தின் விலை உயர்ந்ததால் மட்டுமே இந்த நகையின் மதிப்பு அதிகரித்துள்ளதே தவிர, தனிப்பட்ட முதலீடாக இது லாபகரமானது அல்ல என்பதை அவரது நண்பர் சுட்டிக்காட்டியுள்ளார். இந்தத் தொகையை நகையாக வாங்குவதற்குப் பதிலாக, செய்கூலி சேதாரம் இல்லாத தூய தங்கக் கட்டிகளிலோ அல்லது டிஜிட்டல் தங்கத்திலோ முதலீடு செய்திருந்தால் லாபம் முழுமையாகக் கிடைத்திருக்கும் என்ற கணக்கீடு, நகைகளை முதலீடாகக் கருதுபவர்கள் சிந்திக்க வேண்டிய ஒரு முக்கிய விழிப்புணர்வாக மாறியுள்ளது.