பெற்றோர்களே உஷார்! ஆன்லைன் கேம் கொடுத்த டாஸ்க்… ரகசியமாக வீட்டை விட்டு வெளியேறிய மாணவன்.. அடுத்தடுத்து நடந்த அதிர்ச்சி சம்பவம்…!!

ஆன்லைன் விளையாட்டுகளின் ஆபத்தான சவால்களுக்குச் சிறுவர்கள் பலியாகும் நிகழ்வுகள் அதிகரித்து வரும் நிலையில், உத்தரப் பிரதேச மாநிலம் ஃபிரோஸாபாத்தைச் சேர்ந்த 14 வயது மாணவர் ஒருவர் அதுபோன்ற ஒரு சவாலை நிறைவு செய்வதற்காக யாருக்கும் தெரிவிக்காமல் வீட்டை விட்டு வெளியேறியுள்ளார். திட்டமிட்டபடி குவாலியருக்குச் செல்ல முயன்ற அவரது பயணம் வழியில் தடம்மாறி, இறுதியில் மதுராவைச் சென்றடைந்தது. இச்சம்பவம் ஆன்லைன் கேமிங் விளையாட்டுகளால் சிறுவர்கள் எடுக்கும் தீவிர முடிவுகளையும், அதனால் ஏற்படும் ஆபத்துகளையும் வெளிச்சம்போட்டு காட்டியுள்ளது.

சிறுவன் மாயமானது குறித்து பெற்றோர் அளித்த புகாரின் பேரில், பிராந்தியக் காவல் துறையினர் உடனடியாகச் செயல்பட்டுத் தீவிர தேடுதல் வேட்டையில் ஈடுபட்டனர். சிறுவன் பயணித்த மார்க்கத்தில் உள்ள சிசிடிவி காட்சிப் பதிவுகளை ஆய்வு செய்தும், அவரது மொபைல் போன் சமிக்ஞைகளைத் (Mobile Signals) துல்லியமாகக் கண்காணித்தும் அவர் மதுராவில் இருப்பதை உறுதி செய்தனர். காவல் துறையின் விரைவான மற்றும் திறமையான நடவடிக்கையால் சிறுவன் மதுராவில் எவ்வித ஆபத்துமின்றி பத்திரமாக மீட்கப்பட்டார்.

மீட்கப்பட்ட சிறுவனுக்குப் பேரதிர்ச்சியில் இருந்து மீண்டு வரத் தேவையான உளவியல் ஆலோசனைகள் வழங்கப்பட்டு, பின்னர் பாதுகாப்பாக அவரது பெற்றோரிடம் ஒப்படைக்கப்பட்டார். இச்சம்பவத்தைத் தொடர்ந்து, பெற்றோர் தங்கள் குழந்தைகளின் இணையப் பயன்பாடு மற்றும் ஆன்லைன் கேமிங் நடவடிக்கைகளைக் கூர்ந்து கவனிக்க வேண்டும் என்றும், இதுபோன்ற ஆபத்தான சவால்களில் குழந்தைகள் ஈடுபடாமல் தடுப்பது மிகவும் அவசியம் என்றும் காவல் துறையினர் எச்சரித்து அறிவுறுத்தியுள்ளனர்.