“விவாகரத்து கேட்ட அப்புறம் ஏன் வந்த..?” மாமனார் கேட்ட கேள்வி… சுத்தியல், கத்தியுடன் புகுந்த மருமகன் நடத்திய வெறியாட்டம்.. குலை நடுங்க வைக்கும் சம்பவம்..!!

கிருஷ்ணகிரி மாவட்டத்தில் குடும்பத் தகராறு காரணமாக, பிறந்தநாள் அன்று குழந்தையைப் பார்க்க வந்த மருமகன், மாமனாரைச் சுத்தியல் மற்றும் கத்தியால் கொடூரமாகத் தாக்கிய சம்பவம் பெரும் அதிர்ச்சியை ஏற்படுத்தியுள்ளது. கண்ணன்ட அள்ளி பகுதியைச் சேர்ந்த ஆனந்தன் என்பவரது மகள் கீர்த்தனாவுக்கும் (24), பர்கூர் பகுதியைச் சேர்ந்த சந்திரசேகரன் (32) என்பவருக்கும் கடந்த 6 ஆண்டுகளுக்கு முன்பு திருமணம் நடந்துள்ளது. ஒரு பெண் மற்றும் ஒரு ஆண் குழந்தை உள்ள இந்தத் தம்பதியினர், கருத்து வேறுபாடு காரணமாகக் கடந்த 6 மாதங்களாகப் பிரிந்து வாழ்ந்து வருவதோடு, விவாகரத்துக்கும் நீதிமன்றத்தில் விண்ணப்பித்துள்ளனர்.

இந்நிலையில், அக்டோபர் 26ஆம் தேதி கீர்த்தனாவின் மகனுக்குப் பிறந்தநாள் என்பதால், குழந்தையைச் சந்தித்து வாழ்த்துவதற்காகச் சந்திரசேகரன் மாமனார் வீட்டிற்கு வந்துள்ளார். அப்போது மாமனார் ஆனந்தன், “விவாகரத்து கோரி நீதிமன்றம் சென்ற பிறகு நீ ஏன் இங்கு வந்தாய்?” எனக் கேட்டு சந்திரசேகரனுடன் வாக்குவாதத்தில் ஈடுபட்டுள்ளார். இருவருக்குள்ளும் ஏற்பட்ட இந்தத் தகராறு முற்றவே, ஆத்திரமடைந்த சந்திரசேகரன் தான் மறைத்து வைத்திருந்த கத்தி மற்றும் அங்கிருந்த சுத்தியலை எடுத்து மாமனார் ஆனந்தனைச் சரமாரியாகக் கொடூரமாகத் தாக்கியுள்ளார்.

இக்கோரத் தாக்குதலில் பலத்த காயமடைந்த ஆனந்தன் மீட்கப்பட்டு, சிகிச்சைக்காகக் கிருஷ்ணகிரி அரசு மருத்துவமனையில் அனுமதிக்கப்பட்டுள்ளார். வீட்டிற்குள் புகுந்து மாமனாரை மருமகன் வெறித்தனமாகத் தாக்கும் இந்த நெஞ்சைப் பதறவைக்கும் காட்சிகள் அங்கிருந்த சிசிடிவி கேமராவில் பதிவாகி, தற்போது வெளியாகிச் சமூக ஊடகங்களில் பரவி வருகிறது. இச்சம்பவம் குறித்து மத்தூர் காவல் துறையினர் வழக்குப் பதிவு செய்து தீவிர விசாரணை நடத்தி வருவதோடு, தாக்குதலை நடத்திவிட்டுத் தலைமறைவாக உள்ள மருமகன் சந்திரசேகரனை வலைவீசித் தேடி வருகின்றனர்.