உஷார்! ஃபிரிட்ஜில் பிளாஸ்டிக் பாட்டிலில் தண்ணி குடிக்கிறீங்களா..? உடலில் பாயும் நச்சு ரசாயனம்.. ஆய்வில் வெளியான அதிர்ச்சி உண்மை..!!

குளிர்சாதனப் பெட்டியில் பிளாஸ்டிக் பாட்டில்களில் தண்ணீரைச் சேமித்துத் தொடர்ந்து குடித்து வருவதால், பிளாஸ்டிக்கில் உள்ள நச்சு ரசாயனங்கள் தண்ணீரில் கலந்து உடலுக்குள் செல்லும் பேராபத்து உள்ளது. பிளாஸ்டிக் பாட்டில்களைத் தயாரிக்கப் பயன்படுத்தப்படும் ‘பிஸ்பெனால் ஏ’ மற்றும் தாலேட்டுகள் போன்ற அபாயகரமான வேதிப்பொருட்கள், குறைந்த வெப்பநிலையில் கூட மெதுவாகத் தண்ணீரில் கசியத் தொடங்குகின்றன. நாம் அன்றாடம் பயன்படுத்தும் பழைய மற்றும் தரமற்ற பிளாஸ்டிக் பாட்டில்கள் மூலம், கண்ணுக்குத் தெரியாத மில்லியன் கணக்கான மைக்ரோபிளாஸ்டிக் (Microplastics) நுண்துகள்கள் நம் குடிநீரில் கலந்து விடுகின்றன எனப் பல சமீபத்திய ஆய்வுகள் எச்சரிக்கின்றன.

இந்த நுண் ரசாயனங்கள் மற்றும் பிளாஸ்டிக் துகள்கள் மனித உடலுக்குள் செல்லும்போது, அவை உடலின் இயற்கையான ஹார்மோன் அமைப்பைச் சிதைக்கும் ‘அகச்சுரப்பி சீர்குலைப்பிகளாக’ செயல்படுகின்றன. இதன் காரணமாக, உடலில் கடுமையான ஹார்மோன் சமநிலையின்மை ஏற்பட்டு தைராய்டு, பிசிஓடி , உடல் பருமன் மற்றும் நீரிழிவு போன்ற நாள்பட்ட குறைபாடுகள் ஏற்படுகின்றன. மேலும், செரிமானப் பாதையில் நுழையும் இந்த நச்சுக்கள் குடல் அழற்சி, நாள்பட்ட செரிமானக் கோளாறுகளை உண்டாக்குவதுடன், இரத்த ஓட்டத்தின் வழியாக முக்கிய உறுப்புகளை அடைந்து உடலின் நோய் எதிர்ப்புச் சக்தியையும் பெருமளவில் பலவீனப்படுத்துகின்றன.

எனவே, இத்தகைய உடல்நலப் பாதிப்புகளில் இருந்து தப்பிக்க பிளாஸ்டிக் பாட்டில்களை முற்றிலும் தவிர்ப்பதே புத்திசாலித்தனமாகும். அதற்கு மாற்றாக, செம்பு , பாரம்பரிய மண் பாண்டங்கள் அல்லது உயர்தர கண்ணாடி பாட்டில்களைப் பயன்படுத்தித் தண்ணீரைச் சேமித்து வைப்பது ஆரோக்கியத்திற்குப் பாதுகாப்பானது. குறிப்பாக, மண்பாண்டங்களில் தண்ணீரைச் சேமிக்கும் போது அது இயற்கையாகவே குளிர்ச்சியடைவதுடன் நீரின் காரத்தன்மையையும் (pH level) சீராகப் பராமரிக்க உதவுகிறது.