“மருந்து அளவை குறைங்க”… ChatGPT சொன்ன ‘அந்த’ ஒரு அட்வைஸ்… 31 வயது பெண் என்ஜினீயருக்கு நேர்ந்த கொடூர முடிவு..!!

செயற்கை நுண்ணறிவான சாட்ஜிபிடி வழங்கிய தவறான மருத்துவ வழிகாட்டுதலைப் பின்பற்றி, கால்-கை வலிப்புக்காக எடுத்துவந்த மருந்தின் அளவைத் தானாகவே குறைத்துக் கொண்ட அமெரிக்காவைச் சேர்ந்த 31 வயது மென்பொருள் பொறியாளர் போவன் வான் என்பவர் பரிதாபமாக உயிரிழந்த சம்பவம் உலகளவில் பெரும் அதிர்ச்சியை ஏற்படுத்தியுள்ளது. அமேசான் நிறுவனத்தின் முன்னாள் ஊழியரான இவர், மருந்தின் பக்கவிளைவுகளால் தனது சிந்தனை மற்றும் பேச்சுத் திறன் பாதிக்கப்படுவதாகவும், இதனால் வேலைக்கான நேர்காணல்களில் தம்மால் சிறப்பாகச் செயல்பட முடியவில்லை என்றும் கவலைப்பட்டுள்ளார். இந்தச் சூழலில், தனது அன்றாடப் பிரச்சினைகளுக்கு சாட்ஜிபிடி-யிடம் தீர்வு கேட்டு வந்த அவர், தான் எடுத்துக்கொள்ளும் ‘லாமோட்ரிஜின்’ என்ற வலிப்பு எதிர்ப்பு மருந்தின் அளவைக் குறைப்பது குறித்தும் ஆலோசனை கேட்டுள்ளார். அப்போது, மருத்துவர்களின் கண்காணிப்பு இல்லாமலேயே மருந்தின் அளவைப் படிப்படியாகக் குறைத்து முற்றிலும் நிறுத்துவதற்கான கால அட்டவணையை சாட்ஜிபிடி வழங்கியதாக அவரது பெற்றோர் குற்றம்சாட்டியுள்ளனர்.

வழக்கில் தாக்கல் செய்யப்பட்டுள்ள புகாரின்படி, மருந்தின் அளவைக் குறைக்கும் இந்த ஆபத்தான திட்டத்தை மருத்துவர்களிடம் தெரிவிக்க வேண்டாம் என்று சாட்ஜிபிடி அந்தப் பெண்ணை ஊக்குவித்ததாகவும், அவரது உடல்நிலையில் குழப்பம் மற்றும் நினைவாற்றல் தடுமாற்றம் போன்ற ஆபத்தான அறிகுறிகள் தோன்றியபோதும் உரிய மருத்துவ உதவியை நாடுமாறு போதிய எச்சரிக்கை வழங்கவில்லை என்றும் கூறப்பட்டுள்ளது. ஒரு நாள் போவன் வான் தனது தந்தையுடன் தொலைபேசியில் பேசிக்கொண்டிருந்தபோது திடீரெனப் பேசுவதை நிறுத்தியுள்ளார். பின்னர் அவர் அழைப்புகளை ஏற்காததால், சியாட்டிலில் உள்ள அவரது வீட்டுக்குச் சென்று பார்த்த நண்பர்கள் அவர் உயிரிழந்து கிடப்பதைக் கண்டு அதிர்ச்சியடைந்தனர். மருத்துவப் பரிசோதனையில், கால்-கை வலிப்பு நோயுடன் தொடர்புடைய திடீர் எதிர்பாராத மரணம் தான் அவரது மரணத்திற்குக் காரணம் என உறுதி செய்யப்பட்டதைத் தொடர்ந்து, அவரது பெற்றோர் OpenAI நிறுவனம் மற்றும் அதன் சிஇஓ சாம் ஆல்ட்மேனுக்கு எதிராக நீதிமன்றத்தில் வழக்குத் தொடர்ந்துள்ளனர்.

இந்தத் துயரமான சம்பவம், மருத்துவ ஆலோசனைகளைப் பெறுவதில் செயற்கை நுண்ணறிவின் பாதுகாப்பு மற்றும் நம்பகத்தன்மை குறித்த கடுமையான விவாதங்களை உலகளவில் மீண்டும் எழுப்பியுள்ளது. இதுகுறித்து விளக்கம் அளித்துள்ள OpenAI நிறுவனத்தின் செய்தித் தொடர்பாளர், இந்த மரணம் மிகவும் வேதனையளிப்பதாகக் கூறியதோடு, போவன் வான் பயன்படுத்திய பழைய சாட்ஜிபிடி மாடல் தற்பொழுது பயன்பாட்டில் இல்லை என்றும், சாட்ஜிபிடி என்பது ஒருபோதும் தகுதி வாய்ந்த மருத்துவர்களுக்கு மாற்றாகாது என்றும் அதிகாரப்பூர்வமாகத் தெரிவித்துள்ளார். இணையத்திலோ அல்லது செயற்கை நுண்ணறிவுத் தளங்களிலோ கிடைக்கும் தகவல்களை மட்டுமே முழுமையாக நம்பி, மருத்துவர்களின் முறையான ஆலோசனையின்றித் தங்களின் உயிர்காக்கும் மருந்துகளின் அளவை நோயாளிகள் தன்னிச்சையாக மாற்றுவது எவ்வளவு பெரிய உயிராபத்தை விளைவிக்கும் என்பதை இந்தச் சம்பவம் ஒட்டுமொத்த மனிதகுலத்திற்கும் மிக முக்கிய எச்சரிக்கையாக உணர்த்தியுள்ளது.