“இன்னும் எத்தனை குழந்தைகளை இழப்பது…!”நாடு அல்ல சுடுகாடு…” கதறும் தமிழ்நாடு…!சீமானுக்கு எதிராக காரசார பதிவு…!இயக்குநர் சேரன் கொடுத்த ‘நறுக்கு’ பதிலடி…!

கோவையில் 10 வயது சிறுமிக்கு இழைக்கப்பட்ட கொடூரமும், அவரது கொலையும் ஒட்டுமொத்த தமிழ்நாட்டையும் உலுக்கியுள்ளது. இந்த விவகாரம் பொதுமக்களிடையே பெரும் கொந்தளிப்பை ஏற்படுத்தியுள்ள நிலையில், சமூக வலைத்தளங்களிலும், அரசியல் வட்டாரங்களிலும் பெண்களின் பாதுகாப்பு குறித்த விவாதங்கள் தீப்பற்றி எரியத் தொடங்கியுள்ளன. பலரும் இந்த சம்பவத்திற்கு நீதி கேட்டு தங்களது குரல்களைப் பதிவு செய்து வருகின்றனர்.

இந்த விவகாரத்தில் நாம் தமிழர் கட்சியின் தலைமை ஒருங்கிணைப்பாளர் சீமான், தற்போதைய ஆட்சியில் பெண்கள் மற்றும் குழந்தைகளின் பாதுகாப்பு கேள்விக்குறியாகி இருப்பது வெட்கக்கேடானது என்று மிகக் கடுமையாக விமர்சித்துள்ளார். “பெண்கள் மற்றும் குழந்தைகளின் பாதுகாப்பையும், சுதந்திரத்தையும், தனியுரிமையையும் உறுதிசெய்ய முடியாத ஒரு நாடு நாடல்ல; அது சுடுகாடு” என்று அவர் தனது ஆவேசமான கண்டனத்தைப் பதிவு செய்திருந்தார். இதற்கு ஆதரவாக இணையவாசி ஒருவர், “இதையேதான் ஒவ்வொரு தடவையும் சொல்கிறோம், இன்னும் எத்தனை குழந்தைகளை இழப்பது!” என்று ஆதங்கப்பட்டு, சீமான் மற்றும் இயக்குநர் சேரன் இருவரையும் டேக் செய்து கேள்வி எழுப்பியிருந்தார்.

இதற்குப் பதிலளிக்கும் விதமாக, இயக்குநர் சேரன் சட்டம்-ஒழுங்கு மற்றும் குற்றச்சாட்டுகள் குறித்த முற்றிலும் மாறுபட்ட, விவாதத்திற்குரிய ஒரு பார்வையை முன்வைத்துள்ளார். இந்த விவகாரத்தில் எந்தக் கட்சியாக இருந்தாலும், ஆட்சியில் இருப்பவர்களை மட்டும் குறை சொல்வது சரியல்ல என்று அவர் குறிப்பிட்டுள்ளார். “நன்றாக யோசிக்க தெரிந்தவர்கள் ஆட்சியை மட்டும் குறை சொல்ல மாட்டார்கள். எல்லா வீட்டிலும் காவலர்களை நிறுத்த முடியாது” என்று கூறியுள்ள அவர், இத்தகைய குற்றங்கள் எதனால் உருவாகின்றன என்ற மூலகாரணத்தை ஆராய வேண்டும் என்று வலியுறுத்தியுள்ளார்.

மேலும் அவரது பதிவில், மது மற்றும் போதைப்பொருட்களின் புழக்கமே இத்தகைய கொடூர குற்றங்களுக்கு முக்கியக் காரணம் என்றும், அதனுடன் மக்களின் அஜாக்கிரதை மற்றும் மொபைல் போன்களின் தவறான பயன்பாடுகளும் இதற்கு வழிவகுப்பதாகக் குற்றம் சாட்டியுள்ளார். கடுமையான சட்டங்கள் இல்லாததே மிகப்பெரிய பலவீனம் என்று சுட்டிக்காட்டிய சேரன், மக்கள் முதல்வரிடம் வைக்க வேண்டிய கோரிக்கை கடுமையான சட்டங்களை அமல்படுத்துவதும், மது மற்றும் போதையை ஒழிப்பதுமே ஆகும் என்று கூறியுள்ளார். “நாம் எந்த காரணத்திற்காக ஆட்சியை குறை சொல்கிறோம் என்ற நேர்மை அவசியம்; இது திமுக, அதிமுக, நாதக, தவெக என எல்லா கட்சிகளுக்கும் பொருந்தும்” என்று அவர் பகிர்ந்துள்ள இந்த கருத்து தற்போது இணையத்தில் பெரும் விவாதத்தை ஏற்படுத்தியுள்ளது.