“ஷூட்டிங் ஸ்பாட்ல டிரஸ்ஸை சின்னதாக்கிருவாங்க…!”அதுதான் உண்மையான ஒடுக்குமுறை…!” – வாய்ப்புக்காக இயக்குநர்கள் சொல்லுவதை கேட்கணும் ….! “அப்போ இயக்குநர்கள் கையில்…! ” இப்போ இறைவன் கையில்…!” – மும்தாஜின் உருக்கமான ஆன்மிகப் பயணம்…!

1990களின் இறுதியிலும் 2000களின் தொடக்கத்திலும் தமிழ் சினிமாவில் முன்னணி கவர்ச்சி நட்சத்திரமாக வலம் வந்து, ரசிகர்களின் இதயங்களைக் கொள்ளையடித்தவர் நடிகை மும்தாஜ். டி.ராஜேந்தரின் ‘மோனிஷா என் மோனலிசா’ படத்தின் மூலம் அறிமுகமாகி, தளபதி விஜய்யின் ‘குஷி’ படத்தில் இடம்பெற்ற “கட்டிப்புடி கட்டிப்புடிடா” பாடல் மூலம் ஒட்டுமொத்த தென்னிந்தியாவிலும் பிரபலம் அடைந்தார். தயாரிப்பாளர்கள் தேடி ஓடிய ஒரு காலகட்டத்தைக் கடந்து, பிக்பாஸ் நிகழ்ச்சியிலும் பங்கேற்று தன் வெளிப்படையான குணத்தால் ரசிகர்களைக் கவர்ந்தார். அப்படிப்பட்டவர், தற்போது திரையுலகின் ஒளிரும் வாழ்க்கையைத் துறந்து, முற்றிலும் வேறொரு ஆன்மிகப் பாதையைத் தேர்ந்தெடுத்து வாழ்ந்து வருவது ரசிகர்களிடையே பெரும் ஆச்சரியத்தை ஏற்படுத்தியுள்ளது.

சமீபகாலமாக பொது நிகழ்ச்சிகள் மற்றும் சினிமா வெளிச்சத்திலிருந்து விலகியிருக்கும் மும்தாஜ், இஸ்லாமிய நெறிமுறைகளைப் பின்பற்றி, முற்றிலும் எளிமையான ஆன்மிக வாழ்க்கையை வாழ்ந்து வருகிறார். அண்மையில் வெள்ளை உடையில் மிகவும் எளிமையான தோற்றத்தில் அவர் அளித்த பேட்டி ஒன்று, தற்போது சமூக வலைதளங்களில் காட்டுத்தீயாய் பரவி வருகிறது. அதில், ஒரு நடிகையாகத் தான் அனுபவித்த ஒடுக்குமுறைகளையும், தற்போதைய அமைதியான வாழ்க்கையையும் ஒப்பிட்டு மிகவும் உருக்கமாகப் பேசியுள்ளார். இந்த நேர்காணல் திரையுலகின் மற்றொரு இருண்ட பக்கத்தை வெளிச்சம் போட்டுக் காட்டுவதாக நெட்டிசன்கள் கருத்து தெரிவித்து வருகின்றனர்.

அவர் தனது பேட்டியில், “நான் ஒரு நடிகையாக இருந்தபோது, என்னுடைய வாழ்க்கையும் கேரியரும் இயக்குநர்களின் கைகளில் தான் இருந்தது. முதல் நாள் என்னிடம் காட்டப்படும் ஆடை, மறுநாள் ஷூட்டிங் ஸ்பாட்டில் இன்னும் சிறியதாக மாற்றப்பட்டிருக்கும். இதுகுறித்து நான் கேள்வி எழுப்பினால், ‘கிளாமர் பாடல்களுக்கு ஆடை சிறியதாக இருந்தால்தான் நன்றாக இருக்கும்’ என்று இயக்குநர் தரப்பில் கூறிவிடுவார்கள். வேறு வழியின்றி ஒரு வாய்ப்புக்காக, ஒரு கிரியேஷனுக்காக மற்றவர்கள் சொல்வதைக் கேட்டு நான் வாழ வேண்டியிருந்தது. அதுதான் உண்மையான ஒடுக்குமுறை. இன்று நான் அந்த வாழ்க்கையிலிருந்து முழுமையாக விலகி, மிகுந்த மன அமைதியுடன் வாழ்ந்து வருகிறேன்” என்று தன் சினிமா காலத்து மன உளைச்சலை ஓப்பனாக உடைத்துள்ளார்.

மும்தாஜின் இந்த அதிரடி மனமாற்றமும், நேர்மையான பேச்சும் இணையத்தில் பல விவாதங்களை எழுப்பியுள்ளது. ஒரு தரப்பினர் சினிமா உலகின் கசப்பான உண்மைகளை தைரியமாகப் பேசிய அவரைப் பாராட்டி வர, மற்றொரு தரப்பினர் அவர் தேர்ந்தெடுத்துள்ள புதிய ஆன்மிகப் பாதையை மனதார வாழ்த்தி வருகின்றனர். “வாழ்க்கை ஒவ்வொருவரையும் ஒரு காலகட்டத்தில் சரியான பாதைக்கு அழைத்துச் செல்லும்”, “அவர் தன் மன அமைதிக்காகத் தேர்ந்தெடுத்த இந்த எளிய வாழ்க்கையில் மகிழ்ச்சியாக இருந்தால் அதுவே போதும்” என ரசிகர்கள் தங்களது கலவையான, அதே சமயம் ஆதரவான கருத்துகளை சமூக வலைதளங்களில் பதிவிட்டு வருகின்றனர்.