“அவங்க ரெண்டு பேரும் பார்த்ததே இல்ல…!”ஸ்டேடியத்தில் தெரிந்த ‘திலக்’ ஜெர்சி…! ஸ்ரீலீலாவின் அம்மா நேரில் பார்த்த ஆட்டம்!

தென்னிந்தியத் திரையுலகில் குறுகிய காலத்திலேயே முன்னணி நடிகையாகவும், இளசுகளின் சென்சேஷனல் கிரஷாகவும் வலம் வருபவர் நடிகை ஸ்ரீலீலா. இவரது அசாத்திய நடிப்புத் திறமையை விட, திரையில் இவர் போடும் வெறித்தனமான நடனத்திற்கு என்றே தெலுங்கு, தமிழ் என அத்தனை மொழிகளிலும் ஏராளமான ரசிகர்கள் உள்ளனர். சினிமா, விளம்பரங்கள் எனத் தனது கேரியரில் உச்சத்தை நோக்கிப் பயணித்துக் கொண்டிருக்கும் ஸ்ரீலீலா குறித்து, கடந்த சில நாட்களாக இணையத்தில் ஒரு புதிய காதல் வதந்தி காட்டுத்தீயாய் பரவி சினிமா வட்டாரத்தில் பெரும் பரபரப்பை ஏற்படுத்தியது.

இந்திய கிரிக்கெட் அணியின் இளம் நட்சத்திர வீரரான திலக் வர்மாவும், நடிகை ஸ்ரீலீலாவும் தீவிரமாகக் காதலித்து வருவதாகவும், விரைவில் இவர்களது திருமணம் பற்றிய அறிவிப்பு வெளியாகலாம் என்றும் சமூக வலைதளங்களில் செய்திகள் உலா வந்தன. சினிமா மற்றும் கிரிக்கெட் உலகைச் சேர்ந்த இரண்டு இளம் பிரபலங்கள் என்பதால், நெட்டிசன்கள் பலரும் இந்தத் தகவலைப் பகிர்ந்து விவாதங்களை எழுப்பி வந்தனர். மேலும், இவர்களது காதலைப் பற்றிய பல கற்பனையான கதைகளும் இணையத்தில் தொடர்ந்து வெளியாகி ரசிகர்களிடையே குழப்பத்தை ஏற்படுத்தின.

இந்நிலையில், சமூக வலைதளங்களில் வைரலாகி வரும் இந்த காதல் வதந்திகளுக்கு முற்றுப்புள்ளி வைக்கும் விதமாக நடிகை ஸ்ரீலீலாவின் அம்மா மிகவும் கோபமாக பேட்டி ஒன்றை அளித்துள்ளார். அதில் அவர் பேசுகையில், “ஸ்ரீலீலா மற்றும் திலக் வர்மா குறித்து இணையத்தில் பரவி வரும் காதல் வதந்திகள் முற்றிலும் பொய்யானவை; இதில் துளியும் உண்மை இல்லை. இப்படிப்பட்ட தேவையில்லாத கதைகள் எங்கிருந்து, எப்படி உருவாகிறது என்றே தெரியவில்லை. இது முற்றிலும் கற்பனையான, தவறான தகவல்” என்று கோபத்துடன் தன் ஆதங்கத்தை வெளிப்படுத்தியுள்ளார். அம்மாவின் இந்த அதிரடி விளக்கத்தின் மூலம் இந்த காதல் வதந்திகளுக்கு தற்போது முற்றுப்புள்ளி வைக்கப்பட்டுள்ளது.