“உயிரைக் கொடுத்து உழைச்சோம், ஆனால்…” தலித் மக்களுக்கு திமுக என்ன செஞ்சது..? எனக் கேட்ட வன்னி அரசுக்கு ஆர்.எஸ்.பாரதி காரசார பதிலடி..!!

சட்டப்பேரவையில் தலித் பிரதிநிதித்துவம் மற்றும் திராவிடக் கட்சிகளின் சமூக நீதி அணுகுமுறை குறித்து அமைச்சர் வன்னி அரசு எழுப்பிய கேள்விகள், திமுக மற்றும் தமிழக அரசியல் களத்தில் பெரும் விவாதத்தை ஏற்படுத்தியுள்ளது. தலித் மக்களுக்கு திமுக ஆட்சியில் முறையான அதிகாரப் பகிர்வு வழங்கப்பட்டதா என்றும், கடந்த திமுக ஆட்சியில் 4 விசிக சட்டமன்ற உறுப்பினர்கள் இருந்தும் அவர்களுக்கு அமைச்சரவையில் ஏன் பங்கு தரப்படவில்லை என்றும் அவர் கேள்வி எழுப்பியுள்ளார். தலித் சமூகத்தினரைப் பொதுத் தொகுதிகளில் நிறுத்திக் களம் காணச் செய்வதை ஏதோ சாதனை போலப் பேசுவது, கொள்கை அடிப்படையில் இல்லாமல் வெறும் ‘பரிதாப’ நோக்கில் பார்ப்பது போல உள்ளது என்றும் அவர் கடுமையாகச் சாடியுள்ளார்.

இதற்குப் பதிலடி கொடுக்கும் வகையில் பேசிய திமுக அமைப்புச் செயலாளர் ஆர்.எஸ். பாரதி மற்றும் திமுக சட்டமன்ற உறுப்பினர்கள், தலித் மக்களின் முன்னேற்றத்திற்காகத் திமுக அரசு செய்த வரலாற்றுச் சிறப்புமிக்கப் பணிகளைப் பட்டியலிட்டுள்ளனர். முன்னாள் முதலமைச்சர் மு.கருணாநிதி தலித் மக்களுக்குக் காங்கிரீட் வீடுகளைக் கட்டிக் கொடுத்தது, அனைத்துச் சாதியினரும் அர்ச்சகராகும் சட்டத்தைக் கொண்டு வந்தது உள்ளிட்ட சமூக நீதித் திட்டங்களை அவர்கள் அவையில் நினைவூட்டினர். மேலும், தலித் நீதிபதிகள் நியமனம் தொடர்பாக முன்பு ஆர்.எஸ். பாரதி பேசியதாகக் கூறப்படும் சர்ச்சை கருத்துகளுக்குப் பதிலளித்த திமுகவினர், அது கட்சித் தலைமையால் ஏற்கனவே கண்டிக்கப்பட்டுத் தீர்க்கப்பட்ட ஒரு விஷயம் என்பதைத் தெளிவுபடுத்தினர்.

திமுகவினர் உயிரைக் கொடுத்து உழைத்து வெற்றி பெற வைத்த நிலையில், இன்று ஏதோ ஒரு பதவி கிடைத்துவிட்டது என்பதற்காக, தங்களை ஒடுக்குவது போலவும் மற்றவர்களைத் திருப்திப்படுத்துவது போலவும் அமைச்சர் வன்னி அரசு பேசுவதாகத் திமுக தரப்பில் அதிருப்தி தெரிவிக்கப்பட்டுள்ளது. விசிக அமைச்சரவையில் இடம்பெற்றதை முன்னிறுத்தித் தற்போதைய அரசைப் பாராட்டுவதும், திமுகவின் திராவிட மாடலை விமர்சிப்பதும் தேர்தல் கூட்டணிக் தர்மத்திற்கு எதிரானது என்ற ரீதியில் இரு தரப்பினருக்கும் இடையே சட்டப்பேரவையில் காரசாரமான விவாதங்களும் முழக்கங்களும் அரங்கேறியுள்ளன.