“எனக்கு ஆண் வாரிசுதான் வேண்டும்…” ஆத்திரத்தில் கணவன் செய்த வெறிச்செயல்.. மனைவிக்கு நேர்ந்த கொடூர கதி.. 18 வருட திருமண வாழ்க்கை இரத்தக் கறையுடன் முடிந்த அதிர்ச்சிப் பின்னணி..!!

தெலுங்கானா மாநிலம் கரீம்நகர் மாவட்டம் பொம்மக்கல் பகுதியில், ஆண் குழந்தை பிறக்கவில்லை என்ற காரணத்திற்காக 18 ஆண்டுகள் குடும்பம் நடத்திய மனைவியை, கணவன் கொடூரமாகக் கொலை செய்துவிட்டுத் தப்பியோடிய கொடூரச் சம்பவம் பெரும் அதிர்ச்சியை ஏற்படுத்தியுள்ளது. பொம்மக்கல் கிராமத்தைச் சேர்ந்த சொரூபா (35) என்பவருக்கும், சந்திரகுமார் என்பவருக்கும் கடந்த 18 ஆண்டுகளுக்கு முன்பு திருமணம் நடைபெற்றுள்ளது. இவர்களுக்குத் திருமணம் ஆகி நீண்ட நாட்களாகக் குழந்தை இல்லாத நிலையில், 12 ஆண்டுகளுக்குப் பிறகு ஒரு பெண் குழந்தை பிறந்துள்ளது. ஆனால், தனக்கு ஆண் குழந்தைதான் வேண்டும் எனக் கூறி, கடந்த சில ஆண்டுகளாகச் சொரூபாவை அவரது கணவர் சந்திரகுமார் மன ரீதியாகவும், உடல் ரீதியாகவும் மிகக் கொடூரமாகத் துன்புறுத்தி வந்துள்ளார்.

இந்த வன்கொடுமையின் உச்சமாக, ஆண் வாரிசு இல்லாத ஆத்திரத்தில் சொரூபாவை சந்திரகுமார் கொடூரமாகக் கொலை செய்துள்ளார். இச்சம்பவம் குறித்துத் தகவல் அறிந்த சொரூபாவின் தந்தை சந்திரய்யா, தனது மகளை அவளது கணவர்தான் அடித்துக் கொலை செய்துவிட்டதாகக் கரீம்நகர் ரூரல் காவல் நிலையத்தில் பரபரப்பு புகார் அளித்துள்ளார். இந்தப் புகாரின் பேரில் வழக்குப் பதிவு செய்துள்ள போலீசார், தலைமறைவாக உள்ள சொரூபாவின் கணவர் சந்திரகுமாரைத் தீவிரமாகத் தேடி வருகின்றனர். இக்கொலை வழக்கு குறித்துக் கரீம்நகர் ரூரல் காவல் ஆய்வாளர் நிரஞ்சன் ரெட்டி கூறுகையில், தலைமறைவான குற்றவாளியைப் பிடிக்கத் தனிப்படை அமைக்கப்பட்டுள்ளதாகவும், விசாரணை தீவிரமாக நடைபெற்று வருவதாகவும் தெரிவித்துள்ளார்.