இனிவரும் காலங்களிலும் தவெகவுடன் தான் கூட்டணி.. அதிகாரபூர்வமாக அறிவித்தார் திருமாவளவன்…!!

விடுதலை சிறுத்தைகள் கட்சியின் ‘தமிழ்த் தேசிய எழுச்சி மாநாடு’ இன்று கள்ளக்குறிச்சி மாவட்டம் உளுந்தூர்பேட்டையில் மிக பிரம்மாண்டமாக நடைபெற்றது. கொளுத்தும் வெயிலையும் பொருட்படுத்தாமல் லட்சக்கணக்கான தொண்டர்கள் திரண்ட இந்த மாநாட்டிற்கு, விசிக தலைவர் தொல். திருமாவளவன் தலைமை தாங்கி, கையில் தீப்பந்தம் ஏந்தி மேடைக்கு வருகை தந்தார். இம்மாநாட்டில் தமிழர்களின் மொழி, இனம் மற்றும் அரசியல் உரிமைகளைப் பாதுகாக்கும் வகையில் மாநில அதிகாரங்களை விரிவுபடுத்த வேண்டும் என்ற முக்கிய தீர்மானங்கள் முன்வைக்கப்பட்டன.

மாநாட்டில் உரையாற்றிய விசிக தலைவர் திருமாவளவன், இதுவரை நாம் திமுக, அதிமுக, காங்கிரஸ் போன்ற பல்வேறு ஆளும் கட்சிகளுடன் கூட்டணி அமைத்துப் பயணித்துள்ளோம் என்று தனது கடந்தகால அரசியல் பயணத்தைக் குறிப்பிட்டார். தற்போதைய அரசியல் சூழலில், தமிழக வெற்றிக் கழகத்தின் (தவெக) தலைவரும் முதலமைச்சருமான விஜய் அவர்களுடன் கூட்டணி வைத்துள்ளதாக அவர் அதிகாரப்பூர்வமாகத் தெரிவித்தார். மேலும், வரும் காலங்களில் தமிழக அரசியல் களத்தில் விசிகவும் தவெகவும் இணைந்தே பயணிக்கும் என்றும் அவர் உறுதிபட அறிவித்தார்.

தொடர்ந்து பேசிய அவர், விடுதலை சிறுத்தைகள் கட்சி வெறும் கூட்டணிக் கட்சியாக மட்டுமே நீடிக்காமல், எதிர்காலத்தில் ஆளும் கட்சியாகப் பரிணமிக்க வேண்டும் என்பதே நமது இலக்கு என்று தொண்டர்கள் மத்தியில் எழுச்சியூட்டினார். கட்சித் தொண்டர்களின் கூட்டம் கட்டுக்கடங்காமல் மேடையை ஆக்கிரமித்ததால், பாதுகாப்பு காரணங்களுக்காக மாநாடு திட்டமிட்ட நேரத்திற்கு முன்னதாகவே நிறைவு செய்யப்பட்டது. திருமாவளவனின் இந்த அதிரடி கூட்டணிக் கொள்கை பிரகடனம் தமிழக அரசியல் வட்டாரத்தில் தற்பொழுது பெரும் பரபரப்பை ஏற்படுத்தியுள்ளது.