பாஜகவை தொடர்ந்து அதிமுகவிற்கும் குட்பை…கனத்த இதயத்துடன் இந்த முடிவு …அதிமுகவுக்கு அதிர்ச்சி கொடுத்த கௌதமி…தேர்தல் முடிந்ததும் மாறிய சூழல்… அதிமுகவில் இருந்து கௌதமி வெளியேறியதன் நிஜமான பின்னணி என்ன?…

நடிகையும் அரசியல்வாதியுமான கௌதமி, அதிமுகவின் அனைத்துப் பொறுப்புகள் மற்றும் அடிப்படை உறுப்பினர் பதவியிலிருந்து முழுமையாக விலகுவதாக அக்கட்சியின் பொதுச் செயலாளர் எடப்பாடி பழனிசாமிக்குக் கடிதம் எழுதியிருப்பது அரசியல் வட்டாரத்தில் பெரும் பரபரப்பை ஏற்படுத்தியுள்ளது. கடந்த சில ஆண்டுகளாக அரசியலில் தீவிரமாகச் செயல்பட்டு வந்த கௌதமி, பாஜவிலிருந்து விலகிய பின்னர் அதிமுகவில் இணைந்தார். அவருக்குக் கழகக் கொள்கை பரப்பு துணைச் செயலாளர் பொறுப்பு வழங்கப்பட்டதைத் தொடர்ந்து, தேர்தல் பிரசாரங்கள், பொதுக்கூட்டங்கள் மற்றும் ஊடக விவாதங்களில் அதிமுகவின் நிலைப்பாடுகளைத் தீவிரமாக முன்வைத்து வந்தார். இப்படிப்பட்ட சூழலில், அவர் திடீரென இந்த விலகல் முடிவை அறிவித்திருப்பது அரசியல் களத்தில் பல்வேறு கேள்விகளையும் விவாதங்களையும் எழுப்பியுள்ளது.

எடப்பாடி பழனிசாமிக்கு அவர் எழுதியுள்ள கடிதத்தில், “கழக அடிப்படை உறுப்பினர் மற்றும் கழகக் கொள்கை பரப்பு துணைச் செயலாளர் பதவியிலிருந்து இன்று முதல் என்னை விடுவித்துக் கொள்கிறேன். தற்போதுள்ள அரசியல் சூழலைக் கருத்தில் கொண்டு, சமூக சேவை செய்ய ஏதுவான வகையில் கனத்த இதயத்துடன் இந்த முடிவை எடுத்துள்ளேன்” என்று குறிப்பிட்டுள்ளார். மேலும், கட்சியில் இணைந்த நாள் முதல் தனக்கு முழு ஒத்துழைப்பு வழங்கிய முன்னாள் அமைச்சர்கள், தலைமைக் கழக நிர்வாகிகள், மாநில மற்றும் மாவட்ட நிர்வாகிகள் உள்ளிட்ட அனைவருக்கும் தனது நன்றியையும் அவர் அந்தக் கடிதத்தில் தெரிவித்துள்ளார். கட்சியில் எந்தவிதக் குற்றச்சாட்டுகளையும் முன்வைக்காமல், சமூக சேவையை மட்டுமே காரணமாகக் கூறி அவர் விலகியிருப்பது அனைவரின் கவனத்தையும் ஈர்த்துள்ளது.

சமீபத்தில் நடைபெற்ற சட்டமன்றத் தேர்தலுக்குப் பிறகு அதிமுகவில் பல்வேறு மாற்றங்கள் நிகழ்ந்து வரும் வேளையில், கௌதமியின் இந்த முடிவு மிக முக்கியத்துவம் வாய்ந்ததாகப் பார்க்கப்படுகிறது. கௌதமியின் இந்த ராஜினாமா வெறும் பதவி விலகலா அல்லது அவரது அரசியல் பயணத்தின் அடுத்த கட்ட நகர்வுக்கான முன்னோட்டமா என்ற யூகங்கள் இப்போதே இறக்கை கட்டத் தொடங்கிவிட்டன. ஏற்கனவே பாஜக மற்றும் அதிமுக என இரு முக்கியக் கட்சிகளில் பயணித்துள்ள கௌதமி, அடுத்ததாகத் தமிழக வெற்றிக் கழகத்தில் (தவெக) இணைய வாய்ப்பிருப்பதாக அரசியல் வட்டாரத்தில் பரவலாகப் பேசப்பட்டு வருகிறது. சமூக சேவையில் கவனம் செலுத்தப்போவதாக அவர் கூறியிருந்தாலும், அவரது அடுத்த அரசியல் பாதை என்னவாக இருக்கப் போகிறது என்பதைப் பொறுத்திருந்துதான் பார்க்க வேண்டும்.