“அவங்க இன்னும் சரியான வலியை அனுபவிக்கல” இனி என்ன பண்ணுறேன் பாருங்க..? ஈரான் மேல செம கடுப்பில் டிரம்ப்… அந்த ஒரு முடிவால் உலகமே அதிர்ச்சி..!!

அமெரிக்க அதிபர் டொனால்டு டிரம்ப், ஈரான் மீது இதுவரை இல்லாத வகையிலான மிகப்பெரிய ராணுவத் தாக்குதலைத் தொடுப்பது குறித்துத் தீவிரமாகப் பரிசீலித்து வருகிறார். ‘ஆபரேஷன் எபிக் பியூரி’ (Operation Epic Fury) தாக்குதலை விடவும் இது மிகப்பெரியதாக இருக்கும் என்றும், இதற்கான இறுதி முடிவை எடுக்கும் நிலைக்கு மிக நெருக்கமாகத் தான் இருப்பதாகவும் டிரம்ப் வியாழக்கிழமையன்று தெரிவித்துள்ளார். ஹார்முஸ் ஜலசந்தியில் சர்வதேசக் கப்பல் போக்குவரத்து மீதான ஈரானின் அச்சுறுத்தல்களைத் தொடர்ந்து கடந்த இரண்டு வாரங்களாக அமெரிக்கா நடத்தி வரும் தொடர் வான்வழித் தாக்குதலின் அடுத்தகட்டமாக இந்த எச்சரிக்கை விடுக்கப்பட்டுள்ளது.

அமெரிக்காவுடன் பேச்சுவார்த்தை நடத்த ஈரான் ஆர்வம் காட்டினாலும், ஒரு சுமூகமான ஒப்பந்தத்திற்கு வர அந்நாடு இன்னும் தயாராகவில்லை என்று டிரம்ப் குற்றம் சாட்டியுள்ளார். இதற்குக் காரணமாக, “அவர்கள் இன்னும் போதிய வலியை (சேதத்தை) அனுபவிக்கவில்லை” என்று டிரம்ப் காரசாரமாகக் குறிப்பிட்டுள்ளார். மேலும், வாஷிங்டன் கேட்டுக்கொண்டால் இஸ்ரேல் அடுத்த இரண்டு நிமிடங்களில் இந்த ராணுவக் கூட்டு நடவடிக்கையில் இணையும் என்றும், ஆனால் ஈரானைத் தாக்க அமெரிக்காவிற்கு இஸ்ரேலின் ஆதரவு தேவையில்லை என்றும் அவர் சுட்டிக்காட்டியுள்ளார்.

மறுபுறம், ஏமனின் ஹவுதி கிளர்ச்சியாளர்கள் செங்கடலில் சவுதி அரேபியாவின் கப்பல்களைக் குறிவைத்துத் தாக்குதலைத் தீவிரப்படுத்தியுள்ளதால் இந்தச் சர்வதேச மோதல் மேலும் தீவிரமடைந்துள்ளது. ஹவுதிகள் ஈரானின் பிரதிநிதிகளாகச் செயல்படுவதால், செங்கடல் கப்பல் தாக்குதல்களுக்கு இனி ஈரானே முழுப் பொறுப்பேற்க வேண்டும் என்றும், மீறினால் இரு தரப்பும் கடுமையான ராணுவத் தண்டனையை அனுபவிக்க நேரிடும் என்றும் டிரம்ப் தனது ‘டிரூத் சோசியல்’ பக்கத்தில் எச்சரித்துள்ளார். இந்தத் தொடர் பதற்றங்கள் காரணமாக உலகளவில் கச்சா எண்ணெய் விலை பீப்பாய்க்கு 100 டாலரைத் தாண்டியுள்ளதால் பிராந்தியப் போர் வெடிக்கும் அபாயம் அதிகரித்துள்ளது.