“அடேங்கப்பா… இனி டிராஃபிக்ல நிக்கவே வேண்டாம்..! கரண்ட் இருந்தா போதும்.. கார் வானத்துல பறக்கும்..! இன்ஸ்டாகிராமைக் கலக்கும் அல்மோரா வைரல் வீடியோ..!!

உத்தரகாண்டின் அல்மோரா மாவட்டத்தைச் சேர்ந்த ரவி தம்டா என்ற கண்டுபிடிப்பாளர், ‘ஹபிடா ஸ்கைநெக்ஸ்’ எனும் மின்சாரத்தில் இயங்கும் பறக்கும் காரை உருவாக்கி வெற்றிகரமாகச் சோதித்துள்ளார். ஜாகேஷ்வர் தாம் அருகே உள்ள காஃப்லிகான் கிராமத்தைச் சேர்ந்த இவர், தனது ‘ஹபிடா ஸ்கை பிரைவேட் லிமிடெட்’ என்ற ஸ்டார்ட்அப் நிறுவனம் மூலம் இந்த ஒற்றை இருக்கை வாகனத்தை உருவாக்கியுள்ளார். மேம்படுத்தப்பட்ட ட்ரோன் தொழில்நுட்பத்தைப் பயன்படுத்தி முழுமையாக மின்சாரத்தில் இயங்கும் இந்த வானூர்தி, சுற்றுச்சூழல் பாதுகாப்பு மற்றும் குறுகிய தூரப் போக்குவரத்துக்கான புதிய சாத்தியக்கூறுகளை உருவாக்கியுள்ளது.

சோதனை வெற்றிக்குப் பிறகு, இந்த சாதனை இணையத்திலும் ஊடகங்களிலும் பரவலான கவனத்தைப் பெற்றது. இது குறித்து இன்ஸ்டாகிராமில் வீடியோ பகிர்ந்த ரவி தம்டா, சோதனைக்கு பின் ஏராளமான தொலைபேசி அழைப்புகள் வந்ததாகவும், அல்மோரா அரசு நிர்வாகம் ஊடக நிகழ்வுகளைக் கையாள்வதால் தன்னால் உடனடியாகப் பேச இயலவில்லை என்றும் விளக்கினார். மேலும், தனது இந்த வெற்றிக்காக ஒட்டுமொத்த தேசத்திற்கும் வாழ்த்துகளைத் தெரிவித்த அவர், வாகனத்தின் பின்னணி உருவாக்கக் காட்சிகளையும் அதில் காட்டியிருந்தார்.

ரவி தம்டாவின் இந்த முயற்சிக்கு இணையதளவாசிகளும் உள்ளூர் மக்களும் மிகுந்த வரவேற்பையும் பாராட்டுக்களையும் தெரிவித்து வருகின்றனர். உத்தரகாண்டில் இருந்து இத்தகைய ஒரு புதுமையான முன்மாதிரி வாகனம் உருவானது ஊக்கமளிப்பதாகவும், இது புதிய யுகப் போக்குவரத்தை நோக்கிய ஒரு மாபெரும் திருப்புமுனை என்றும் பலரும் தங்கள் கருத்துகளைப் பதிவிட்டு வருகின்றனர்.