“யாருமே என்கிட்ட சொல்லல” போற வழியிலேயே என் புள்ள செத்துட்டான்… ஆசிரமப் பள்ளியில் 6 வயது சிறுவன் மர்ம மரணம்! – பெற்றோருக்குச் சொல்லாமல் மூடிமறைத்த பள்ளி நிர்வாகம்..? கதறும் தந்தை…!!

மகாராஷ்டிராவின் பால்கர் மாவட்டத்திலுள்ள பழங்குடியின ஆசிரமப் பள்ளி ஒன்றில் 6 வயது சிறுவன் உயிரிழந்த சம்பவம் பெரும் அதிர்ச்சியை ஏற்படுத்தியுள்ளது. இரண்டு நாட்களாக காய்ச்சலால் பாதிக்கப்பட்டிருந்த அந்த மாணவனின் உடல்நிலை திடீரென மோசமடைந்ததால், மருத்துவமனைக்கு அழைத்துச் செல்லும் வழியிலேயே அவர் பரிதாபமாக உயிரிழந்தார். மேலும், இச்சம்பவத்தைத் தொடர்ந்து அப்பள்ளியில் சளி, இருமல் போன்ற அறிகுறிகளுடன் இருந்த மேலும் 26 மாணவர்கள் முன்னெச்சரிக்கை நடவடிக்கையாக ஆரம்ப சுகாதார நிலையத்தில் தீவிர மருத்துவக் கண்காணிப்பில் வைக்கப்பட்டுள்ளனர்.

இச்சம்பவத்தில் பள்ளி நிர்வாகம் தங்களுக்கு உடனடியாக தகவல் தெரிவிக்கவில்லை என்றும், மற்றொரு மாணவர் போன் செய்து கூறிய பிறகே தங்களுக்கு விஷயம் தெரியவந்தது என்றும் உயிரிழந்த சிறுவனின் தந்தை குற்றம் சாட்டியுள்ளார். இப்புகாரைத் தொடர்ந்து அதிகாரிகள் நடத்திய ஆய்வில், அந்தப் பள்ளியின் குடிநீர் வசதி மற்றும் அடிப்படை சுகாதார ஏற்பாடுகளில் குறைபாடுகள் இருப்பது கண்டறியப்பட்டது. இதனால், பள்ளி வளாகத்தைத் தூய்மைப்படுத்தவும், மாணவர்களுக்குத் தடையின்றி உடனடி மருத்துவச் சிகிச்சை வழங்கவும் பழங்குடியின மேம்பாட்டுத் துறை அதிகாரிகள் உத்தரவிட்டுள்ளனர்.

மகாராஷ்டிராவில் உள்ள அரசு மற்றும் அரசு உதவி பெறும் ஆசிரமப் பள்ளிகளில் கடந்த இரண்டு ஆண்டுகளில் மட்டும் பாம்புக்கடி, நோய்கள் உள்ளிட்ட பல்வேறு காரணங்களால் 584 மாணவர்கள் உயிரிழந்துள்ளதாக அரசு புள்ளிவிவரங்கள் தெரிவிக்கின்றன. இத்தகைய குடியிருப்புப் பள்ளிகளில் தங்கிப் படிக்கும் குழந்தைகளின் பாதுகாப்பையும், முறையான அவசர மருத்துவ வசதிகளையும் உறுதி செய்ய வேண்டிய கட்டாயத்தை இந்தச் சோகச் சம்பவம் மீண்டும் விவாதப் பொருளாக்கியுள்ளது.