“என் வாழ்க்கையையும் தொழிலையும் காப்பாத்த வேற வழி தெரியல… 2 வாரத்தில் பெற்ற தாயையே வேலையை விட்டு தூக்கிய மகள்..! வைரல் பின்னணி..!!”

மும்பையைச் சேர்ந்த இளம் தொழிலதிபரும் படைப்பாளியுமான அவந்தி நாக்ரால், ஹார்வர்ட் பல்கலைக்கழகத்தில் சேர்வதற்கு முன்பு தனது கலை மற்றும் இசை சார்ந்த பணிகளை நிர்வகிக்க ஒரு மேலாளர் தேவைப்பட்டதால், தனது தாயாரையே அந்தப் பொறுப்பில் நியமித்தார். மின்னஞ்சல்களைக் கையாளுதல், கட்டணங்களை நிர்ணயித்தல், பயண ஏற்பாடுகள் மற்றும் பிற பணிகளைத் தாயார் கவனித்துக் கொள்வார் என அவர் நம்பினார். இருப்பினும், தாயாரை மேலாளராக நியமித்த இரண்டே வாரங்களில் அவரை அந்தப் பொறுப்பிலிருந்து அவந்தி நீக்கினார்.

தான் தாயாரை வேலைநீக்கம் செய்ததற்கான காரணத்தை அவந்தி விளக்குகையில், தன் தாய் தன் மீது அளவுக்கு அதிகமாகப் பாசமும் அக்கறையும் காட்டியதே இதற்குக் காரணம் எனக் குறிப்பிட்டுள்ளார். “என் மகள் இதைவிடச் சிறந்த வாய்ப்புகளுக்குத் தகுதியானவள்” எனக் கூறி தாய் பெரும்பாலான வாய்ப்புகளை நிராகரித்தார். மேலும், இரவு நேர நிகழ்ச்சிகள், முன்பின் தெரியாத நகரங்களுக்குப் பயணம் செய்தல் மற்றும் பாதுகாப்பு உறுதியில்லாத கூட்டங்கள் போன்ற சிறு ஆபத்துகள் சாத்தியமுள்ள வாய்ப்புகளையும் அவர் தடுத்தார். இதனால், அவர் ஒரு மேலாளராகச் செயல்படாமல், மகளைப் பாதுகாக்கும் ஒரு தாயாக மட்டுமே செயல்பட்டார் என்பதை அவந்தி உணர்ந்தார்.

இதனைத் தொடர்ந்து, தனிப்பட்ட வாழ்க்கையையும் தொழில்முறை முடிவுகளையும் தெளிவாகப் பிரித்துச் செயல்படக்கூடிய பிற தொழில்முறை மேலாளர்கள் மற்றும் நிறுவனங்களின் உதவியை அவந்தி நாடினார். கலைத்துறையில் உள்ள பலருக்கு தகுந்த தொழில்முறை மேலாளர்கள் கிடைக்காததால், அவர்கள் தொழில்முறை அனுபவம் இல்லாத பெற்றோர், நண்பர்கள் அல்லது உறவினர்களையே நம்பியிருக்க வேண்டிய சூழல் நிலவுகிறது என்றும், இந்த இடைவெளியைப் பற்றித் தான் சிந்திப்பதாகவும் அவர் தனது லிங்க்ட்இன் பதிவில் தெரிவித்துள்ளார்.