“என் நகை எங்கும் போகவில்லை!’… திருவிழாவில் சாமியாடிய பெண் காட்டிய மேஜிக்.. கருவறையில் நடந்த மிரளவைக்கும் அதிசயம்.. போலீசாரால் முடியாததைச் செய்த அம்மன்.. திருத்தணியில் பரபரப்பு..!!

திருத்தணியை அடுத்த ஆர்.கே.பேட்டை தாலுகா அய்யனேரி கிராமத்தில் உள்ள பிரசித்தி பெற்ற திரவுபதி அம்மன் கோவிலில், நேற்று முன்தினம் மதியம் அம்மன் சிலையில் இருந்த 10 சவரன் தங்கச் சங்கிலி திடீரென மாயமானது பெரும் பரபரப்பை ஏற்படுத்தியது. தீமிதி திருவிழாவை முன்னிட்டு கடந்த இரண்டு நாட்களாக ஏராளமான பக்தர்கள் சாமி தரிசனம் செய்து வந்த நிலையில், கூட்ட நெரிசலைப் பயன்படுத்தி மர்ம நபர் யாரோ நகையைத் திருடிச் சென்றது தெரியவந்தது. இதுகுறித்து ஆர்.கே.பேட்டை போலீசாருக்கு தகவல் தெரிவிக்கப்பட்டு, அவர்கள் நேரில் வந்து விசாரணை நடத்தியும் நகையைக் கண்டுபிடிக்க முடியாததால் ஒட்டுமொத்த கிராம மக்களும், கோவில் நிர்வாகத்தினரும் அதிர்ச்சியில் ஆழ்ந்திருந்தனர்.

இந்த நிலையில், நேற்று மாலை கோவிலில் தீமிதி திருவிழாவிற்கான ஏற்பாடுகள் தீவிரமாக நடந்து கொண்டிருந்தபோது, அங்கு திரண்டிருந்த நூற்றுக்கணக்கான பக்தர்கள் மத்தியில் ஒரு விசித்திரமான சம்பவம் அரங்கேறியது. கோவில் பூசாரியின் மனைவியான மகேஸ்வரி என்பவருக்கு திடீரென அருள்வந்து சாமியாடத் தொடங்கினார். சாமியாடியபடியே அருள்வாக்குக் கூறிய அவர், “எனது நகை எங்கும் போகவில்லை, இங்குதான் உள்ளது” என்று உரக்கக் கூறியவாறு கோவிலைச் சுற்றி வந்தார். பின்னர் திடீரென கருவறைக்குள் சென்றுவிட்டு வெளியே வந்த அவரது கையில், திருடுபோனதாகக் கூறப்பட்ட 10 சவரன் அம்மன் நகை இருந்ததைக் கண்டு அங்கிருந்த பக்தர்கள் அனைவரும் உறைந்து போயினர்.

“என் நகை திருடு போகவில்லை, இங்குதான் இருக்கிறது” என்று மகேஸ்வரி பக்தர்களிடம் நகையைக் காட்டிய சம்பவம் அய்யனேரி கிராமத்தில் காட்டுத்தீ போல பரவியது. அம்மன் சிலையிலிருந்து நகையைத் திருடியதால் தங்களுக்கு ஏதாவது தெய்வீகக் குற்றம் அல்லது பாதிப்பு வந்துவிடுமோ என்ற பயத்தில், நகையைத் திருடிய மர்ம நபர்களே அதனை மீண்டும் ரகசியமாகக் கொண்டு வந்து போட்டுவிட்டுச் சென்றிருக்கலாம் என்று பக்தர்கள் பரவசத்துடன் பேசிக் கொண்டனர். அதே சமயம், சாமியாடிய பெண் கருவறையிலிருந்து நகையை எப்படிச் சரியாகக் கண்டுபிடித்தார் என்ற குழப்பமும் கேள்விகளும் சில தரப்பில் எழுந்தாலும், திருடுபோன அம்மன் நகை பத்திரமாக மீட்கப்பட்டதைத் தொடர்ந்து தீமிதி திருவிழா மிகுந்த விமரிசையாகவும் நிம்மதியுடனும் நடந்து முடிந்தது.