“காப்பாற்ற வேண்டிய போலீசா இப்படி..?” முடியைப் பிடித்து இழுத்துத் தாக்கிய போலீஸின் அராஜகம்.. நியாயம் கேட்ட பெண்ணுக்கு நேர்ந்த கொடூரம்.. பரபரப்பு பின்னணி..!!

பீகார் மாநிலம் முசாஃபர்பூர் மாவட்டம் காந்தி காவல் நிலைய எல்லைக்குட்பட்ட நர்சந்தா கிராமத்தில், நியாயம் கேட்டு போராடிய பெண் ஒருவரை காவல்துறை அதிகாரிகள் கொடூரமாக தாக்கிய காணொளி சமூக ஊடகங்களில் வெளியாகி பெரும் அதிர்வலைகளை ஏற்படுத்தியுள்ளது. கடந்த மே மாதம் கோவிலில் சாதி மறுப்புத் திருமணம் செய்து கொண்ட அப்பெண்ணின் கணவர் சில நாட்களிலேயே காணாமல் போனதால், தனது மாமியார் வீட்டிற்கு அவர் நியாயம் கேட்கச் சென்றுள்ளார். அங்கு கணவர் இல்லாததால் அவரது சகோதரரின் வீட்டு வாசலில் அமர்ந்து போராட்டம் நடத்திய நிலையில், சம்பவ இடத்திற்கு வந்த காந்தி காவல் நிலைய ஆய்வாளர் நிவேதிதா மற்றும் டயல்-112 அதிகாரிகள் அப்பெண்ணை வலுக்கட்டாயமாக கைது செய்ய முயன்றுள்ளனர். அப்போது ஏற்பட்ட கைகலப்பில், பெண் காவலர்கள் அப்பெண்ணின் முடியைப் பிடித்து தரதரவென இழுத்து, தரையில் தள்ளி கொடூரமாகத் தாக்கியதுடன் அங்கிருந்து வலுக்கட்டாயமாக அப்புறப்படுத்தியுள்ளனர்.

காவல்துறையின் இந்த மனிதநேயமற்ற செயல்பாட்டு பாணிக்கு எதிராக சம்பவ இடத்தில் இருந்த உள்ளூர் மக்கள் திரண்டு, போலீசாருக்கு எதிராக முழக்கங்களை எழுப்பி கடுமையான போராட்டத்தில் ஈடுபட்டனர். இக்கொடூரச் சம்பவம் தொடர்பான காணொளி இணையத்தில் வைரலாகி மக்கள் மத்தியில் பெரும் கொந்தளிப்பை ஏற்படுத்தியதைத் தொடர்ந்து, உயர்தரப்பு காவல்துறை அதிகாரிகள் இந்த விவகாரத்தைக் கையில் எடுத்துள்ளனர். இச்சம்பவம் குறித்து விரிவான விசாரணை நடத்தப்பட்டு வருவதாகவும், விசாரணையின் முடிவில் அத்துமீறலில் ஈடுபட்டு குற்றச்சாட்டு நிரூபிக்கப்படும் காவல்துறை அதிகாரிகள் மற்றும் பணியாளர்கள் மீது மிக கடுமையான சட்ட நடவடிக்கை எடுக்கப்படும் என்றும் மேற்குப் பகுதி எஸ்டிபிஓ (SDPO) சுசித்ரா குமாரி உறுதியளித்துள்ளார்.