தயாரிப்பாளர் அர்ச்சனா கல்பாத்திக்கு பதவி கொடுத்தது ஏன்..? அவர் மாமனார் கோடிக்கணக்கில்… உண்மையை போட்டுடைத்த அமைச்சர் ரமேஷ்..!!

‘GOAT’ திரைப்பட தயாரிப்பாளர் அர்ச்சனா கல்பாத்தி அறங்காவலர்களைத் தேர்வு செய்யும் குழுவில் நியமிக்கப்பட்டது ஏன் என்பது குறித்துத் தமிழக அறநிலையத்துறை அமைச்சர் ரமேஷ் விளக்கமளித்துள்ளார். அர்ச்சனா கல்பாத்தியைத் தயாரிப்பாளராக மட்டுமே பார்ப்பதால் இத்தகைய விமர்சனங்கள் எழுகின்றன என்றும், ஒருவருக்கு இரண்டு முகங்கள் இருக்கக்கூடும் என்றும் அவர் குறிப்பிட்டுள்ளார். சினிமா துறையைச் சேர்ந்தவர்களுக்குத் தொடர்ந்து அரசு பதவிகள் வழங்கப்படுவதாக எதிர்க்கட்சிகள் குற்றம்சாட்டி வரும் நிலையில் அமைச்சரின் இந்த விளக்கம் வெளியாகியுள்ளது.

அர்ச்சனா கல்பாத்தி 10-க்கும் மேற்பட்ட கோவில்களுக்குப் பல்வேறு திருப்பணிகளைச் செய்துள்ளார் என்றும், அவருடைய மாமனார் கோடி கணக்கில் கோவில்களுக்குத் திருப்பணிகளைச் செய்து வருபவர் என்றும் அமைச்சர் ரமேஷ் சுட்டிக்காட்டியுள்ளார். ஆன்மீகம் மற்றும் கோவில் திருப்பணிகளில் அவர்களின் குடும்பத்திற்கு இருக்கும் நீண்ட காலப் பங்களிப்பைக் கருத்தில் கொண்டே இந்த நியமனம் நடைபெற்றுள்ளதாக அவர் தெளிவுபடுத்தியுள்ளார். தகுதியின் அடிப்படையிலேயே அவர் தேர்வு செய்யப்பட்டுள்ளதாகத் தவெக தரப்பு வாதிடுகிறது.

சினிமா தயாரிப்பாளர் ஒருவருக்கு ஆன்மீகம் சார்ந்த முக்கியக் குழுவில் பதவி வழங்கப்பட்ட விவகாரம் தற்போது தமிழக அரசியல் வட்டாரத்தில் பெரும் விவாதப் பொருளாக மாறியுள்ளது. விஜய்யை வைத்துப் படம் எடுத்தவர்களுக்கு மட்டுமே பதவி கிடைப்பதாக எதிர்க்கட்சிகள் விமர்சித்து வரும் சூழலில், அமைச்சரின் இந்த ஆன்மீகப் பின்னணி விளக்கம் சமூக ஊடகங்களில் நெட்டிசன்களால் காரசாரமாக விவாதிக்கப்பட்டு வருகிறது.