“யார் ஜெயிச்சாங்கன்னு கேட்டா மனிதநேயம்னு சொல்லுங்க” டெல்லி ஜந்தர் மந்தரில் நெகிழ்ச்சி… காயமடைந்த போலீசாருக்கு அன்போடு விசிறிவிட்ட மாணவர்கள்; வைரலாகும் மனிதநேய வீடியோ..!!

டெல்லியின் ஜந்தர் மந்தர் பகுதியில் நடைபெற்ற ஒரு போராட்டத்தின் போது, காயமடைந்த போலீஸ் அதிகாரி ஒருவருக்கு அங்கிருந்த மாணவர்கள் செய்த நெகிழ்ச்சியான உதவி குறித்த வீடியோ தற்போது இணையத்தில் வைரலாகி வருகிறது. கடமையின் போது காயமடைந்து, வலியால் சாலையோர நடைபாதையில் அமர்ந்திருந்த அந்த போலீஸ் அதிகாரிக்கு, போராட்டத்தில் ஈடுபட்டிருந்த சில மாணவர்கள் கைக் விசிறியால் விசிறி காற்று வீசியுள்ளனர். காவல்துறையினருக்கும் மாணவர்களுக்கும் இடையே பதற்றமான சூழல் நிலவக்கூடிய இடத்திலும், மாணவர்கள் காட்டிய இந்த மனிதநேயம் பலரையும் நெகிழ வைத்துள்ளது.

இந்த நெகிழ்ச்சியான வீடியோ சமூக ஊடகங்களில் காட்டுத்தீயாகப் பரவி, தற்போதைய நிலவரப்படி 1 கோடியே 14 லட்சத்திற்கும் அதிகமான பார்வைகளையும் , 3.5 லட்சத்திற்கும் அதிகமான விருப்பங்களையும் பெற்றுள்ளது. ‘இன்ஸ்டாகிராம்’ போன்ற தளங்களில் இந்த வீடியோவை பகிர்ந்த பயனர்கள், மாணவர்களின் வளர்ப்பு முறையையும் அவர்களது பெற்றோர்களையும் பாராட்டி வருகின்றனர். “யார் வென்றார்கள் என்று யாராவது கேட்டால், மனிதநேயம் வென்றது என்று சொல்லுங்கள்” என நெட்டிசன்கள் பலரும் தங்களது கருத்துக்களைப் பதிவிட்டு வருகின்றனர்.

https://www.instagram.com/reel/DbGlz3RJ8Fo/?utm_source=ig_web_button_share_sheet

போராட்டக் களங்களில் பொதுவாக வன்முறையும் மோதல்களும் மட்டுமே செய்தியாக மாறும் வேளையில், இந்த சம்பவம் அமைதியையும் பரஸ்பர அன்பையும் வெளிப்படுத்தியுள்ளது. காயமடைந்த போலீசாருக்கு மாணவர்கள் உதவியபோது, அங்கிருந்த மற்ற பெண் காவலர்களும் மாணவர்களைத் தடுக்காமல் கூட்டத்தை நெறிமுறைப்படுத்த மட்டுமே முயன்றனர். வன்முறையைத் தவிர்த்து மனிதநேயத்தைத் தேர்ந்தெடுத்த இந்த இளைஞர்களின் செயல், காவல்துறையினருக்கும் பொதுமக்களுக்கும் இடையே ஒரு நல்லிணக்கப் பாலமாகப் பார்க்கப்படுகிறது.