மிகுந்த மனவேதனையுடன் விலகுகிறேன்…அண்ணாமலையின் புதிய கூடாரத்திற்கு தாவுகிறாரா சுமதி வெங்கடேசன்…நயினார் நாகேந்திரன் சொன்ன அந்த ஒரு வார்த்தை! அண்ணாமலை ஆதரவாளர்கள் விலகலுக்கு பாஜாகவின் ரியாக்‌ஷன்…!

முன்னாள் தமிழக பாஜக தலைவர் அண்ணாமலை கட்சியிலிருந்து விலகி, புதிய அரசியல் இயக்கம் ஒன்றைத் தொடங்கியுள்ள நிலையில், தமிழக பாஜகவில் அடுத்தடுத்து முக்கிய நிர்வாகிகள் வெளியேறி வருவது அரசியல் வட்டாரத்தில் பெரும் பரபரப்பை ஏற்படுத்தியுள்ளது. அண்ணாமலையின் ராஜினாமாவைத் தொடர்ந்து கட்சியின் மாநிலத் துணைத் தலைவர் கரு. நாகராஜன் அண்மையில் விலகிய நிலையில், தற்போது மாநிலச் செயலாளர் சுமதி வெங்கடேசனும் தனது பொறுப்பிலிருந்தும் கட்சியிலிருந்தும் விலகுவதாக அதிரடியாக அறிவித்துள்ளார். போராட்டம் ஒன்றில் கை, தலையில் கட்டுடன் முகத்தில் சிரிப்புடன் காட்சியளித்த புகைப்படத்தின் மூலம் சமூக வலைதளங்களில் பிரபலமான இவர், மிகுந்த மனவேதனையுடனும் நீண்ட சிந்தனைக்குப் பிறகுமே இந்த முடிவை எடுத்துள்ளதாகத் தெரிவித்துள்ளார்.

தனது விலகல் அறிக்கையில், பாஜகவில் பணியாற்றியது பெருமைக்குரிய அனுபவம் என்றும், பிரதமர் நரேந்திர மோடியின் தேசியவாதக் கொள்கைகள் தன்னை எப்போதும் ஊக்குவிக்கும் என்றும் சுமதி வெங்கடேசன் குறிப்பிட்டுள்ளார். கட்சித் தலைமைக்கு நன்றி தெரிவித்துள்ள அவர், தனது அடுத்தகட்ட அரசியல் நகர்வு குறித்து அதிகாரப்பூர்வமாக எதையும் அறிவிக்கவில்லை. எனினும், அண்ணாமலைக்கு ஆதரவாகக் கருதப்படும் முக்கிய நிர்வாகிகள் தொடர்ந்து வெளியேறி வருவதால், அவர்கள் அனைவரும் அண்ணாமலையின் புதிய இயக்கத்தில் இணையக்கூடும் என்ற பலத்த சந்தேகம் எழுந்துள்ளது. தனிநபர் புகழைத் தாண்டி சாமானிய மக்களுக்கான மாற்று அரசியல் கலாச்சாரத்தை உருவாக்குவதே தனது நோக்கம் என்றும், தனது இயக்கம் வரும் சட்டமன்றத் தேர்தலில் போட்டியிடும் என்றும் அண்ணாமலை ஏற்கனவே அறிவித்துள்ளார்.

இதற்கிடையில், அண்ணாமலை மற்றும் அவரது ஆதரவாளர்களின் இந்த விலகல் முடிவுகளை பாஜக தலைமை பெரிதாக எடுத்துக்கொள்ளவில்லை என கட்சியின் தற்போதைய மாநிலத் தலைவர் நயினார் நாகேந்திரன் தெரிவித்துள்ளார். உலகின் மிகப்பெரிய அரசியல் கட்சியான பாஜகவிற்கு ஒரு சிலரின் விலகலால் எந்தப் பாதிப்பும் ஏற்படாது என்றும், கட்சி தனது கொள்கைப் பாதையில் உறுதியாகப் பயணிக்கும் என்றும் அவர் கூறியுள்ளார். இருப்பினும், அண்ணாமலையின் புதிய இயக்கம் எந்த அளவுக்கு மக்கள் ஆதரவைத் திரட்டப் போகிறது மற்றும் பாஜகவிலிருந்து மேலும் எத்தனை நிர்வாகிகள் அங்கு செல்லப் போகிறார்கள் என்பதுதான் தமிழக அரசியலின் அடுத்தகட்ட நகர்வாக உற்றுநோக்கப்படுகிறது.