1990-ல் தப்பியோடிய 18 வயது சிறுவன்… 2026-ல் கைதான 55 வயது பெரியவர்..! அவுட் கொடுத்த ஆத்திரத்தில் அம்பயர் மீது கொடூரத் தாக்குதல்..! 36 ஆண்டு கால தேடலுக்குப் பின் கைதான கிரிக்கெட் வீரர்..!!

மும்பையின் போரிவலி பகுதியில் 1990-ஆம் ஆண்டு நடைபெற்ற கிரிக்கெட் போட்டியின் போது, அம்பயரை கொடூரமாகத் தாக்கிய குற்றத்திற்காக 36 ஆண்டுகளாகத் தலைமறைவாக இருந்த நபரை காவல்துறை தற்போது கைது செய்துள்ளது. கைது செய்யப்பட்ட நபரின் பெயர் ஓம்பிரகாஷ் லல்தா பாசி என்பதாகும். இச்சம்பவம் நடந்த போது அவருக்கு 18 வயது மட்டுமே ஆகியிருந்த நிலையில், தற்போது அவருக்கு 55 வயதாகிறது. தானே மாவட்டத்தின் மீரா ரோட் பகுதியில் வைத்து போரிவலி காவல்துறையினர் இவரைக் கைது செய்தனர்.

இந்தச் சம்பவம் 1990-ஆம் ஆண்டில் நடைபெற்றது. போரிவலியில் நடந்த ஒரு கிரிக்கெட் போட்டியின் போது, களத்தில் இருந்த அம்பயர் ஓம்பிரகாஷ் பாசியை ‘அவுட்’ என அறிவித்தார். இதனால் கடும் ஆத்திரமடைந்த பாசி, தன்னுடைய நிதானத்தை இழந்து தான் வைத்திருந்த கிரிக்கெட் பேட்டால் அம்பயரின் தலையில் பலமாகத் தாக்கினார். இதில் அம்பயர் பலத்த காயமடைந்தார். இத்தாக்குதலைத் தொடர்ந்து ஓம்பிரகாஷ் பாசி சம்பவ இடத்திலிருந்து தப்பி ஓடி தலைமறைவானார்.

இதையடுத்து, போரிவலி காவல் நிலையத்தில் ஓம்பிரகாஷ் பாசி மீது கொலை முயற்சி உள்ளிட்ட பல்வேறு பிரிவுகளின் கீழ் வழக்குப்பதிவு செய்யப்பட்டது. இருப்பினும், நீதிமன்ற விசாரணைக்கு அவர் ஆஜராகாமல் தொடர்ந்து தலைமறைவாகவே இருந்ததால், நீதிமன்றம் அவரைத் தேடப்படும் குற்றவாளியாக அறிவித்தது. காவல்துறையின் பிடியில் இருந்து தப்ப அவர் தனது முகவரி மற்றும் தொடர்பு விவரங்களை அடிக்கடி மாற்றி வந்துள்ளார். இறுதியில், நவீன தொழில்நுட்ப உதவி மற்றும் பழைய தகவல்களை வைத்து மீரா ரோட் கிழக்கு பகுதியில் உள்ள பூனம் ரெசிடென்சியில் வைத்து காவல்துறையினர் அவரைப் பிடித்து தீவிர விசாரணை மேற்கொண்டு வருகின்றனர்.