ஓய்வுபெறும் நேரத்தில் ‘சிக்ஸர்’ அடிக்க முயற்சி..? சொந்த அமர்வுக்கு வழக்குகளை மாற்றி முறைகேடு… ராஜஸ்தான் உயர் நீதிமன்ற தற்காலிக தலைமை நீதிபதியை இடமாற்றம் செய்ய.. உச்ச நீதிமன்ற நீதிபதி வலியுறுத்தல்..!!

நீதிபதி சந்தீப் மேத்தா, ராஜஸ்தான் உயர் நீதிமன்றத்தின் தற்காலிக தலைமை நீதிபதி சஞ்சீவ் பிரகாஷ் சர்மா மீது பல்வேறு கடுமையான குற்றச்சாட்டுகளை முன்வைத்து, அவரை உடனடியாக அப்பதவியிலிருந்து மாற்றம் செய்யக் கோரி தலைமை நீதிபதி சூர்ய காந்திற்கு ஆகஸ்ட் 2, 10 மற்றும் 17 ஆகிய தேதிகளில் கடிதங்களை எழுதியுள்ளார். ஓய்வுபெறவிருக்கும் நிலையில் உள்ள நீதிபதி சர்மா, செல்வாக்குமிக்க மற்றும் தனியாருக்கு சாதகமாக வழக்கைப் பட்டியலிடுதல், தனது அதிகாரத்தைத் தவறாகப் பயன்படுத்துதல் மற்றும் பிற நீதிபதிகளைப் பழிவாங்கும் நடவடிக்கைகளால் அச்சுறுத்துதல் போன்ற நடவடிக்கைகளில் ஈடுபட்டுள்ளதாக அக்கடிதத்தில் குறிப்பிடப்பட்டுள்ளது. எனவே, ராஜஸ்தான் உயர் நீதிமன்றத்தின் நலனைக் கருதி வேறு மாநிலத்தைச் சேர்ந்த ஒருவரை உடனடியாக தலைமை நீதிபதியாக நியமிக்க வேண்டும் என்றும் அவர் வலியுறுத்தியுள்ளார்.

நீதிபதி மேத்தாவின் கடிதத்தில், குறிப்பிட்ட சில முக்கிய நிலங்கள் தொடர்பான மேல்முறையீட்டு வழக்குகளை தனது சொந்த அமர்வுக்கு மாற்றி உத்தரவிட்டது, ஜோத்பூர் நீதிமன்றக் கட்டிடத் திறப்பைத் தன்னிச்சையாகத் தாமதப்படுத்தியது மற்றும் சக நீதிபதி உமா சங்கர் வியாஸின் மனைவிக்கு எதிராகப் பழிவாங்கும் நோக்கில் செயல்பட்டது போன்ற விவகாரங்கள் சுட்டிக்காட்டப்பட்டுள்ளன. மேலும், வழக்கறிஞர் பூஜா திரிபாதி அளித்த புகாரைக் குறிப்பிட்டு, நிரந்தர லோக் அதாலத் பதவிகளுக்குத் தனது நண்பர்கள் மற்றும் நெருங்கியவர்களின் வாழ்க்கைத் துணைவர்களை நியமித்தது, உயர் நீதிமன்ற நீதிபதி பதவி உயர்விற்காக தற்போது வழக்கறிஞராகவே பணியாற்றாத நான்கு பெண்களின் பெயர்களைப் பரிந்துரைத்தது எனப் பல்வேறு நிர்வாக முறைகேடுகளையும் நீதிபதி மேத்தா வெளிச்சத்திற்குக் கொண்டுவந்துள்ளார்.

2016-ல் ராஜஸ்தான் உயர் நீதிமன்ற நீதிபதியாக நியமிக்கப்பட்ட நீதிபதி சர்மா, பாட்னா, பஞ்சாப் மற்றும் ஹரியானா உயர் நீதிமன்றங்களில் பணியாற்றிய பிறகு, 2025 மே மாதம் மீண்டும் ராஜஸ்தானுக்கு மாற்றப்பட்டு தற்காலிக தலைமை நீதிபதியாகப் பொறுப்பேற்றார். 10 மாதங்களுக்கும் மேலாகப் பதவியில் இருக்கும் இவரது இத்தகைய நடவடிக்கைகளால் நீதித்துறை அமைப்பிற்கு மேலும் சேதம் ஏற்படுவதைத் தடுக்கும் வகையில், உச்ச நீதிமன்ற கொலீஜியம் உடனடியாகத் தலையிட்டு நடவடிக்கை எடுக்க வேண்டும் என 2023-ல் உச்ச நீதிமன்ற நீதிபதியாகப் பதவி உயர்வு பெற்ற சந்தீப் மேத்தா தனது கடிதத்தில் மீண்டும் மீண்டும் கோரிக்கை விடுத்துள்ளார்.