மளமளவென சரிந்த கூரை.. வெள்ளமாய் பாய்ந்த தண்ணீர்..! அமெரிக்க சூப்பர் மார்க்கெட்டில் நடந்த நடுக்கடலிலும் தப்பிய 27 உயிர்கள்..!!

அமெரிக்காவின் நியூ ஜெர்சி, மன்மத் கவுண்டியில் உள்ள ஓஷன் டவுன்ஷிப் பகுதியில் ‘பிஜேஸ் ஹோல்சேல் கிளப்’ என்ற சூப்பர் மார்க்கெட் இயங்கி வருகிறது. கடந்த திங்கட்கிழமை காலை சுமார் 11:15 மணியளவில், அங்கு பொதுமக்கள் வழக்கம்போல் தங்களுக்குத் தேவையான பொருட்களை வாங்கிக் கொண்டிருந்தனர். அப்போது, அந்தப் பகுதியில் பெய்த கடுமையான மழை மற்றும் மோசமான வானிலை காரணமாக, சூப்பர் மார்க்கெட்டின் கூரையின் ஒரு பெரிய பகுதி எதிர்பாராதவிதமாகத் திடீரென இடிந்து விழுந்தது. கூரை உடைந்தவுடன், அதன் வழியே மழைநீர் கடைக்குள் வெள்ளம் போல் பாய்ந்து வரத் தொடங்கியது.

இந்த விபத்து நடந்த சமயத்தில் சூப்பர் மார்க்கெட்டிற்குள் ஊழியர்கள் மற்றும் வாடிக்கையாளர்கள் என மொத்தம் 27 பேர் இருந்தனர். கூரை இடிந்து விழுந்த சத்தத்தைக் கேட்டு அங்கிருந்தவர்கள் அலறியடித்துக் கொண்டு ஓடினர். இதில் இரண்டு பேர் இடிபாடுகளுக்குள் பகுதியாகச் சிக்கிக் கொண்டனர், ஆனால் அவர்கள் தங்களின் புத்திசாலித்தனத்தால் காயங்களின்றி சுயமாக வெளியே வந்தனர். அதிர்ஷ்டவசமாக, இவ்வளவு பெரிய விபத்து நடந்தபோதிலும், அங்கிருந்த 27 பேரும் எந்தவொரு பெரிய காயமுமின்றி பாதுகாப்பாக மீட்கப்பட்டனர். யாருக்கும் உயிர்ச்சேதம் ஏற்படவில்லை என்பது பெரும் நிம்மதியை அளித்துள்ளது.

விபத்து குறித்துத் தகவல் அறிந்ததும், உள்ளூர் போலீசாரும் மீட்புக் குழுவினரும் உடனடியாக சம்பவ இடத்திற்கு விரைந்தனர். இடிபாடுகளுக்குள் யாராவது சிக்கியிருக்கிறார்களா என்பதை உறுதி செய்ய அதிநவீன ‘இன்டோர் ட்ரோன்கள்’ மற்றும் மோப்ப நாய்கள் உதவியுடன் தீவிர தேடுதல் வேட்டை நடத்தப்பட்டது. இந்த பயங்கரமான விபத்தின் காட்சிகள் அங்குள்ள சிசிடிவி கேமராவில் பதிவாகியிருந்தது. தற்போது அந்த வீடியோ சமூக வலைத்தளங்களில் வெளியாகி வைரலாகி வருகிறது. இதைத் தொடர்ந்து, பாதுகாப்பு காரணங்களுக்காகப் பொதுமக்கள் யாரும் தற்போதைக்கு அந்தப் பகுதிக்கு வரவேண்டாம் என போலீசார் அறிவுறுத்தியுள்ளனர்.